Payızda balqabaq və duzlu kələm yemək xüsusilə vacibdir.
Medicina.az-a istinadən, nutrisioloq Mariya Dujeva payız aylarında balqabaq və tərkibində provitamin A zəngin olan digər qidaların istehlak edilməsini tövsiyə edir.
Dujeva izah edir ki, günəş işığı çatışmazlığı, rütubətli və soyuq hava şəraiti ilə üzləşən orqanizmin payızda optimal fəaliyyət göstərməsinə hansı qidalar xüsusilə kömək edir. Mütəxəssis, xüsusilə, tərkibində karotinoidlər olan qidaların payız rasionuna daxil edilməsini təklif edir. Karotinoidlər orqanizmdə immun sisteminin əsas aktivləşdiricisi olan A vitamininə çevrilən maddələrdir.
“Balqabaq əla karotinoid mənbəyidir. Bu maddələrə digər tərəvəzlərdə də rast gəlinsə də, balqabaq həmçinin orqanizmi güclü immun sistemi üçün vacib olan sinklə təmin edir. Balqabaq haqlı olaraq ən yaxşı sink mənbələrindən biri hesab olunur; o, qocalma prosesini ləngitməyə kömək edir, toxumları isə beyin və qaraciyər fəaliyyəti üçün faydalıdır", - Dujeva söyləyib.
Bundan əlavə, nutrisioloq payızda duzlu kələm yeməyi tövsiyə edir:
“Onun istehlakı orqanizmi bağırsaq mikrobiomunda faydalı bakteriyaların çoxalmasına şərait yaradan probiotik və prebiotiklərlə təmin edir. Duzlu kələm insan sağlamlığına son dərəcə müsbət təsir göstərir".
Dujevanın sözlərinə görə, payız rasionuna həmçinin C vitamini, E vitamini və faydalı yağlarla zəngin qidalar daxil edilməlidir.