Mal ətini yumşaq və şirəli bişirməyin 2 sadə üsulu

Mal əti zülal və dəmir baxımından zəngin olsa da, düzgün hazırlanmadıqda quru və sərt alınır. Xüsusilə qızartma zamanı ətin şirəsini itirməsi yeməyin dadına mənfi təsir göstərir. Bunun qarşısını almaq üçün aşpazların istifadə etdiyi bəzi sadə kulinariya üsullarından yararlanmaq mümkündür.

Foodinfo.az aytına istinadla, mal ətini daha yumşaq və şirəli hazırlamaq üçün qida sodasından və kivinin təbii fermentlərindən istifadə etmək olar.

1. Qida sodası ilə yumşaltmaq

Qida sodası ətin səthindəki turşuluq səviyyəsini dəyişərək bişirmə zamanı daha yumşaq qalmasına kömək edir. Bunun üçün yarım kiloqram doğranmış mal ətinə bir çay qaşığından az soda əlavə etmək tövsiyə olunur. Ət qarışdırıldıqdan sonra soyuducuda təxminən 40 dəqiqə saxlanılır. Daha sonra soda qalıqları yaxşıca yuyulur, ət qurulanır və marinad edilərək bişirilir.

2. Kivi ilə marinad etmək

Kivi mal ətini yumşaltmaq üçün istifadə edilən təbii vasitələrdən biridir. Onun tərkibindəki aktinidin fermenti zülalları parçalayaraq ətin liflərinin yumşalmasına kömək edir. Bunun üçün kivi blenderdən keçirilərək püre halına salınır və marinada əlavə edilir. Mənbədə ətin bu qarışıqda təxminən 120 dəqiqə saxlanılması tövsiyə olunur. Lakin kivi güclü təsir göstərdiyindən marinad müddətini uzatmaq ətin həddindən artıq yumşalmasına və teksturasının pozulmasına səbəb ola bilər.

Ətin yumşaq və şirəli alınmasında onun düzgün bişirilməsi də mühüm rol oynayır. Həddindən artıq yüksək temperaturda və uzun müddət qızartmaq ətin nəmini itirməsinə səbəb ola bilər. Buna görə istifadə edilən ət hissəsinə uyğun bişirmə üsulu seçilməlidir.

Bu sadə üsullar xüsusilə sərt lifli mal ətinin hazırlanmasında faydalı ola bilər. Əsas məsələ marinadın miqdarına və müddətinə diqqət yetirməkdir.