Bakı, 16 noyabr, AZƏRTAC Müasir qlobal geosiyasi reallıqlar fonunda dövlətlərarası münasibətlərin dərinləşdirilməsi və etibarlı tərəfdaşlıq mexanizmlərinin qurulması xüsusi aktuallıq kəsb edir. Uzun illər ərzində formalaşmış qarşılıqlı etimad və siyasi dialoq mühiti rəsmi Bakının Avropanın aparıcı güc mərkəzləri ilə əlaqələrini keyfiyyətcə yeni müstəviyə çıxarmasına imkan verir. Məhz bu ardıcıl diplomatik fəaliyyətin məntiqi nəticəsi kimi, Azərbaycanın beynəlxalq münasibətlər sistemində mövqeyinin getdikcə möhkəmlənməsi, regional və qlobal proseslərə artan təsiri, eləcə də milli maraqlara söykənən müstəqil xarici siyasət kursu ölkəmizin aparıcı dünya dövlətləri ilə əməkdaşlığının yeni məzmun qazanmasına möhkəm zəmin yaradır. Bu baxımdan Azərbaycan Respublikası ilə Böyük Britaniya və Şimali İrlandiya Birləşmiş Krallığı arasında Strateji Tərəfdaşlıq haqqında Birgə Bəyannamənin imzalanması ikitərəfli münasibətlərin tarixində mühüm siyasi hadisə olmaqla yanaşı, ölkəmizin beynəlxalq nüfuzunun və geosiyasi çəkisinin artmasının növbəti bariz təsdiqidir. 2026-cı il noyabrın 12-də Dublində Azərbaycan Prezidenti İlham Əliyev və Böyük Britaniyanın Baş naziri Endi Börnhem tərəfindən imzalanan tarixi sənəd iki ölkə arasında illərdir formalaşmış çoxşaxəli tərəfdaşlığın daha geniş və yeni strateji istiqamətlər üzrə inkişaf etdirilməsini nəzərdə tutur.Bu fikirləri AZƏRTAC-a açıqlamasında Milli Məclisin deputatı Kamran Bayramov deyib.“Bu strateji yaxınlaşmanın tarixi köklərinə nəzər saldıqda görürük ki, iki ölkə arasındakı bugünkü yüksəksəviyyəli dialoq təsadüfi xarakter daşımır. Əslində Azərbaycan ilə Böyük Britaniya arasında münasibətlər uzun onilliklər ərzində formalaşmış qarşılıqlı maraqların, dərin siyasi etimadın və ardıcıl əməkdaşlığın məntiqi nəticəsidir. Müstəqilliyimizin ilk illərində 1994-cü il fevralın 23-də imzalanmış Dostluq və Əməkdaşlıq haqqında Birgə Bəyannamə və 1998-ci il iyulun 21-də qəbul edilmiş Dostluq Münasibətləri və Tərəfdaşlıq haqqında Birgə Bəyannamə bu əlaqələrin möhkəm hüquqi-siyasi bazasını formalaşdıran təməl sənədlər kimi tarixə düşmüşdür. Ümummilli Lider Heydər Əliyevin müəyyənləşdirdiyi uzaqgörən xarici siyasət strategiyasında rəsmi Londonla əlaqələrin inkişafına xüsusi önəm verilməsi də məhz Azərbaycanın beynəlxalq əməkdaşlıq əlaqələrinin genişləndirilməsi və ölkəmizin qlobal iqtisadi sistemə uğurlu inteqrasiyası baxımından həlledici rol oynayırdı. Məhz həmin dövrdə təməli qoyulmuş qarşılıqlı etimad mühiti sonrakı mərhələlərdə siyasi dialoqun daha da dərinləşməsinə, ticari-iqtisadi əlaqələrin şaxələnməsinə və tərəfdaşlığın sarsılmaz dayaqlar üzərində ucalmasına geniş imkanlar açdı. Məhz bu möhkəm zəmin üzərində noyabrın 12-də imzalanmış yeni Bəyannamə ikitərəfli münasibətlərin sadəcə məntiqi davamı deyil, sürətlə dəyişən beynəlxalq reallıqlar fonunda keyfiyyətcə tamamilə yeni mərhələyə keçididir”, - deyə K.Bayramov bildirib. Milli maraqlara söykənən xarici siyasət kursu Onun fikrincə, sənədin başlıca siyasi dəyəri ondan ibarətdir ki, Bakı və London əməkdaşlığın ənənəvi istiqamətlərini qoruyub saxlamaqla yanaşı, münasibətləri müdafiə və təhlükəsizlik, ticarət və investisiya, habelə təhsil, elm və innovasiya kimi müasir strateji sahələr hesabına daha da zənginləşdirirlər. Beləliklə, ikitərəfli tərəfdaşlıq ayrı-ayrı sektorlar üzrə lokal əməkdaşlıq çərçivəsindən çıxaraq uzunmüddətli hədəflərə və dayanıqlı institusional mexanizmlərə əsaslanan vahid, geniş siyasi-iqtisadi platformaya çevrilir. Bu konseptual yanaşma həm mövcud əlaqələrin davamlılığını təmin edir, həm də gələcək dövr üçün perspektivli əməkdaşlıq imkanları yaradır. Deputat diqqətə çatdırıb ki, Vaşinqton razılaşmaları və Cənubi Qafqazda davamlı sülhün bərqərar olması istiqamətində rəsmi Bakının irəli sürdüyü sülh gündəliyinə Böyük Britaniyanın dəstək verməsi regionda sabitliyin möhkəmlənməsi baxımından mühüm əhəmiyyət daşıyır. İqtisadi müstəvidə isə otuz ildən artıq davam edən ənənəvi enerji əməkdaşlığı artıq daha müasir və çoxşaxəli məzmun qazanır. Tərəfdaşlıq gündəliyinə bərpaolunan enerji mənbələri, yaşıl maliyyələşdirmə, aşağı karbonlu texnologiyalar və müasir infrastruktur layihələri daxil edilib. Xüsusilə Orta Dəhlizin inkişafına verilən dəstək Azərbaycanın Avrasiya məkanında əsas nəqliyyat-logistika mərkəzi kimi mövqeyini daha da gücləndirərək, Şərq-Qərb ticarət əlaqələrinin genişlənməsinə böyük töhfə verir. “Azərbaycan ilə Böyük Britaniya arasında imzalanmış Strateji Tərəfdaşlıq haqqında Birgə Bəyannamə ikitərəfli münasibətlərin gələcək inkişafında tamamilə yeni bir siyasi dövrün başlanğıcını qoyur. Şübhəsiz ki, bu uğurun təməlində Prezident İlham Əliyevin rəhbərliyi ilə həyata keçirilən müstəqil, praqmatik və milli maraqlara söykənən uzaqgörən xarici siyasət kursu dayanır. Məhz bu siyasət nəticəsində Azərbaycan qlobal güc mərkəzləri ilə bərabərhüquqlu və qarşılıqlı faydalı dialoq qurmağı bacaran nüfuzlu dövlətə çevrilib”, - deyə K.Bayramov vurğulayıb.