Moody’s reytinq agentliyinin ekspertləri hesab edirlər ki, əlverişli iqtisadi şərait və dayanıqlı gəlirlilik sayəsində qlobal bank sektoru 2027-ci ilə güclü mövqedə daxil olacaq.
Reuters yazır ki, Moody’s-in qiymətləndirməsinə görə, banklar dəyişən bazar şərtlərinə uyğunlaşıb və pul-kredit siyasətinin sürətlə sərtləşdirilməsi dövründə qəfil sarsıntıların öhdəsindən gəliblər. Bu, onlara davam edən geosiyasi və iqtisadi qeyri-müəyyənliyə daha yaxşı hazırlaşmağa imkan verib.
Moody’s qlobal bank sektoru üçün 2027-ci il üzrə “stabil” proqnoz müəyyənləşdirib. Bu proqnoz agentliyin qarşıdakı 12 ayda sektorda kreditləşmənin fundamental göstəricilərinə dair qiymətləndirməsini əks etdirir.
Hesabatda bildirilir ki, inflyasiya zəiflədikcə G20 ölkələrində iqtisadi artımın və işsizlik səviyyəsinin sabit qalacağı gözlənilir.
Moody’s hesab edir ki, geosiyasi risklər, tənzimləmələrin yumşaldılması, özəl bazarların genişlənməsi, uzunmüddətli dövlət istiqrazlarının gəlirliliyi, borclanma xərclərindəki kəskin artımın gecikmiş təsiri, eləcə də süni intellekt və texnologiyalara yatırılan investisiyalar gələn il bank kreditlərinin keyfiyyətini müəyyənləşdirən əsas amillər olacaq.
“Bankların aktivlərinin keyfiyyəti üçün əsas risk 2022–2024-cü illərdə pul-kredit siyasətinin sərtləşdirilməsi tsiklinin gecikmiş təsiri və bu prosesin 2026-cı ildə yenidən güclənməsidir. Korporativ və fərdi borcalanlar xeyli aşağı faiz dərəcələri şəraitində yaranmış borcları hələ də yenidən maliyyələşdirməli və ya tədricən ödəməlidirlər”, Moody’s-in hesabatında bildirilib.
Moody’s 2027-ci ilin ikinci yarısında sabit faiz dərəcələrinin borcalanlar üçün yenidən maliyyələşdirmə imkanlarını yaxşılaşdıracağını və kredit itkilərini məhdudlaşdıracağını gözləyir. Bununla belə, inflyasiya təzyiqi və şirkətlərin borclarını yenidən maliyyələşdirməsi aktivlərin keyfiyyəti üçün əsas risk olaraq qalacaq.