Bakı, 7 noyabr, AZƏRTAC Zəfər Günü Azərbaycan tarixinin ən şanlı və unudulmaz səhifələrindən biridir. Bu əlamətdar gün xalqımızın illərlə qəlbində yaşatdığı azadlıq arzusunun gerçəkləşdiyi, milli iradəmizin və dövlətçilik əzmimizin bütün dünyaya nümayiş olunduğu möhtəşəm bir tarixdir. Zəfər Günü, sadəcə, təqvimdə qeyd olunan bayram deyil, xalqımızın mübarizə əzminin, Vətən sevgisinin, birliyinin və qəhrəmanlığının canlı təcəssümüdür.Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.O qeyd edib ki, Azərbaycan torpaqlarının uzun illər işğal altında qalması xalqımız üçün ağır sınaq olub. Yüz minlərlə soydaşımız doğma ev-eşiyindən didərgin düşüb, şəhər və kəndlərimiz dağıdılıb, tarixi və mədəni abidələrimizə ciddi ziyan vurulub. Bütün bu çətinliklərə baxmayaraq, Azərbaycan xalqı öz torpaqlarına qayıtmaq inamını itirməyib, dövlətimiz ərazi bütövlüyünün bərpasını daim əsas milli məqsəd kimi qarşıya qoyub.“Prezident İlham Əliyevin rəhbərliyi ilə həyata keçirilən ardıcıl və məqsədyönlü siyasət nəticəsində Azərbaycan iqtisadi, siyasi və hərbi baxımdan böyük inkişaf yolu keçib. Ölkənin müdafiə qüdrətinin artırılması, müasir hərbi texnologiyaların əldə edilməsi, milli hərbi sənayenin inkişafı və beynəlxalq əlaqələrin genişləndirilməsi güclü dövlət quruculuğunun mühüm istiqamətlərinə çevrilib. Bütün bu fəaliyyətlər Azərbaycanın öz suveren hüquqlarını və ərazi bütövlüyünü bərpa etmək iradəsinin ifadəsi idi.2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatlarına cavab olaraq başlayan Vətən müharibəsi xalqımızın tarixində yeni bir mərhələnin əsasını qoydu. Azərbaycan Ordusu Ali Baş Komandanın rəhbərliyi ilə əks-hücum əməliyyatlarına başladı. Müharibənin ilk günlərindən etibarən əsgər və zabitlərimizin nümayiş etdirdiyi şücaət, yüksək döyüş hazırlığı və qətiyyət xalqımızda böyük inam yaratdı. Cəmi 44 gün ərzində ordumuz bir-birinin ardınca yaşayış məntəqələrini, strateji yüksəklikləri və mühüm əraziləri işğaldan azad edərək tarixi Qələbəyə doğru irəlilədi.Vətən müharibəsinin ən möhtəşəm hadisələrindən biri noyabrın 8-də Şuşa şəhərinin azad edilməsi oldu. Mədəniyyətimizin beşiyi, Qarabağın tacı olan Şuşanın azadlığı Azərbaycan xalqının iradəsinin və ordumuzun qəhrəmanlığının rəmzinə çevrildi. Bu qələbə ilə Ermənistanın məğlubiyyəti reallığa çevrildi və noyabrın 10-da imzalanan üçtərəfli bəyanatla – Ermənistanın kapitulyasiya aktı ilə hərbi əməliyyatlar dayandırıldı. Bununla da Azərbaycanın ərazi bütövlüyünün bərpası istiqamətində tarixi dönüş baş verdi.Qazanılan Zəfərin arxasında minlərlə qəhrəman Azərbaycan övladının fədakarlığı dayanır. Şəhidlərimizin müqəddəs qanı, qazilərimizin döyüş meydanında göstərdiyi rəşadət, hərbçilərimizin peşəkarlığı və xalqımızın sarsılmaz həmrəyliyi bu qələbənin mənəvi əsasını təşkil edir. Şəhidlərimiz Vətən naminə ən ali fədakarlıq nümunəsini göstərərək adlarını tarixə əbədi həkk etdilər. Onların əziz xatirəsini yaşatmaq, qazilərimizə diqqət və qayğı göstərmək hər birimizin mənəvi borcudur”, - deyə Ə. Məhərrəmzadə vurğulayıb. Deputat əlavə edib ki, Zəfərdən sonrakı dövrdə Azərbaycan qarşısında yeni vəzifələr müəyyənləşdirdi. İşğaldan azad edilmiş ərazilərdə genişmiqyaslı quruculuq və bərpa işlərinə başlanıldı. Yeni yollar, körpülər, hava limanları, yaşayış kompleksləri, məktəblər və digər sosial obyektlər inşa edildi. Uzun illər doğma yurdlarından ayrı düşmüş ailələrin öz torpaqlarına qayıtması üçün şərait yaradıldı. Böyük Qayıdış prosesi xalqımızın tarixi yaddaşının və milli kimliyinin yenidən doğma torpaqlarda möhkəmlənməsinə xidmət edir.Bu gün Azərbaycan qalib dövlət kimi öz inkişafını davam etdirir, beynəlxalq nüfuzunu möhkəmləndirir və regionda sülhün, təhlükəsizliyin təmin olunması istiqamətində mühüm addımlar atır. 8 Noyabrın tarixi əhəmiyyəti də məhz ondadır ki, bu gün bizə güclü dövlətin, milli həmrəyliyin və qətiyyətli iradənin nələrə qadir olduğunu göstərir.Zəfər Günü hər bir azərbaycanlı üçün qürur mənbəyi, gələcək nəsillər üçün isə əsl vətənpərvərlik dərsidir. Bu müqəddəs tarixi yaşatmaq, şəhidlərimizin xatirəsini daim uca tutmaq, müstəqilliyimizi qorumaq və dövlətimizin inkişafına töhfə vermək hamımızın borcudur.
