Bakı, 27 oktyabr, AZƏRTAC Süni intellekt artıq yalnız elmi tədqiqatlarla məhdudlaşmır, həm də mədəniyyətlərarası mübadilə proseslərinə təsir göstərir. Alqoritmik sistemlər müxtəlif xalqların mədəniyyətlərinin təqdim olunmasında və qarşılıqlı anlaşmanın gücləndirilməsində mühüm rol oynaya bilər.AZƏRTAC xəbər verir ki, bu fikirləri Tacikistanın mədəniyyət naziri Matlubaxon Sattoriyen VII Ümumdünya Mədəniyyətlərarası Dialoq Forumu çərçivəsində oktyabrın 27-də keçirilən Beynəlxalq təşkilatların 3-cü yüksəksəviyyəli görüşü və “Bakı Prosesi” çərçivəsində nazirlərin 6-cı görüşünün xüsusi birgə sessiyasındakı çıxışında səsləndirib.Nazir diqqətə çatdırıb ki, qlobal rəqəmsallaşma və süni intellektin inkişafı şəraitində mədəniyyətlərin tarixi yaddaşının qorunması xüsusi əhəmiyyət daşıyır: “Texnoloji tərəqqi dillərin sıxışdırılmasına və mədəni müxtəlifliyin azalmasına səbəb olmamalıdır. Süni intellekt dillərin inkişafına, mədəni bərabərsizliyin azaldılmasına və mədəni irsin qorunmasına xidmət etməlidir. Tacikistanda mədəniyyətin inkişafı istiqamətində işlər ardıcıl şəkildə davam etdirilir. Bu prosesdə bərabər imkanlar prinsipinə əsaslanmaq, maddi və qeyri-maddi mədəni irsin qorunmasını təmin etmək vacibdir”.Matlubaxon Sattoriyen süni intellekt sistemlərində alqoritmik qərəzliliyə və ayrı-seçkiliyə yol verməməyin əsas prinsip olduğunu vurğulayıb: “Dezinformasiyanın yayılmasının qarşısının alınması, ölkələr arasında rəqəmsal bərabərsizliyin azaldılması, elmi biliklərə çıxış imkanlarının genişləndirilməsi və təcrübə mübadiləsinin təşviqi də əsas prioritetlər sırasındadır. Süni intellekt ictimai müzakirələrdən kənarda mövcud ola bilməz. Əsas məsələ bu texnoloji tərəqqinin hansı məqsədlərə xidmət edəcəyidir. Tarixi irsin obyektiv təqdimatının təmin edilməsi və mədəni müxtəlifliyin qorunaraq gələcək nəsillərə ötürülməsi beynəlxalq əməkdaşlığın mühüm vəzifələridir”. Fotoqraf - İlkin Cavanşirov Videooperator - Vüsal Tağıyev