Azərbaycanda tikintiyə icazə prosedurlarının sadələşdirilməsi, dövlət qurumları arasında koordinasiyanın gücləndirilməsi və rəqəmsal xidmətlərin təkmilləşdirilməsi istiqamətində yeni mərhələyə başlanılıb.
Həyata keçirilən dəyişikliklərin əsas məqsədi tikinti layihələrində gecikmələri azaltmaq, şəffaflığı artırmaq və sahibkarlar üçün daha əlverişli biznes mühiti formalaşdırmaqdır.
Prezident İlham Əliyevin Sərəncamı ilə Tikinti Layihələri üzrə Koordinasiya Komissiyası yaradılıb.
Mütəxəssislərin sözlərinə görə, yeni mexanizm tikinti layihələrinin hazırlanması, razılaşdırılması və icazə prosedurlarında yaranan problemlərin operativ həllini, dövlət qurumlarının fəaliyyətinin əlaqələndirilməsini və icra müddətlərinə nəzarəti nəzərdə tutur.
Yeni komissiyanın fəaliyyət istiqamətlərindən biri də tikinti prosesində yaranan problemlərin sistemli şəkildə araşdırılması və aidiyyəti qurumlar arasında operativ həll mexanizminin yaradılmasıdır. Bununla yanaşı, çoxmənzilli binaların sökülməsi və yenidən tikilməsi zamanı vətəndaşların maraqlarının qorunması da diqqət mərkəzində olacaq. Çünki belə layihələrdə ən çox narahatlıq doğuran məsələlərdən biri tikinti şirkətlərinin öhdəliklərini vaxtında yerinə yetirməməsi və layihələrin yarımçıq qalmasıdır.
Beləliklə, yeni komissiyanın yaradılması tikinti sektorunda idarəetmənin təkmilləşdirilməsi, icazə proseslərinin sürətləndirilməsi və layihələrin icrasına nəzarətin gücləndirilməsi baxımından mühüm addım hesab olunur. Dəyişikliklərin nəticələrinin isə komissiyanın fəaliyyəti və hazırlanacaq təkliflərin icrası ilə ortaya çıxacağı gözlənilir.
(Xezerxeber)