London, 8 noyabr, AZƏRTAC Londonda 8 Noyabr – Zəfər Günü münasibətilə tədbir keçirilib.AZƏRTAC xəbər verir ki, tədbir Britaniya Azərbaycanlıları Assosiasiyasının təşkilatçılığı və Azərbaycan Diasporuna Dəstək Fondunun dəstəyi ilə baş tutub. Tədbirdə Azərbaycanın Böyük Britaniyadakı səfiri Elin Süleymanov, Türkiyənin Londondakı səfiri Osman Koray Ertaş, Böyük Britaniya parlamentinin üzvü Nesil Çalışkan, Barnet rayonunun meri Zahra Beg, Britaniya Azərbaycanlıları Assosiasiyasının sədri Hafiz Baxşəliyev, diaspor nümayəndələri, eləcə də Azərbaycan və türk icmalarının üzvləri iştirak ediblər.Tədbir Azərbaycan və Böyük Britaniyanın Dövlət himnlərinin səsləndirilməsi ilə başlayıb. Daha sonra Azərbaycanın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib. Tədbirdə çıxış edən Azərbaycanın Böyük Britaniyadakı səfiri Elin Süleymanov 8 Noyabr – Zəfər Gününün Azərbaycan xalqının tarixində mühüm yer tutduğunu bildirib. Diplomat Azərbaycanın ərazi bütövlüyünün bərpası uğrunda canlarından keçən şəhidlərin xatirəsini ehtiramla yad edib, 44 günlük Vətən müharibəsində əldə olunan Qələbənin tarixi əhəmiyyətindən danışıb.Səfir qeyd edib ki, Zəfər Günü Azərbaycan xalqının birlik və həmrəyliyinin rəmzidir. O, xaricdə yaşayan azərbaycanlıların milli dəyərlərin qorunması, Azərbaycan həqiqətlərinin beynəlxalq ictimaiyyətə çatdırılması və ölkəmizin xaricdə təmsil olunmasında mühüm rol oynadıqlarını vurğulayıb.Türkiyənin Böyük Britaniyadakı səfiri Osman Koray Ertaş da çıxış edərək Azərbaycan xalqını Zəfər Günü münasibətilə təbrik edib. Tədbirdə iştirak edən Böyük Britaniya parlamentinin üzvü Nesil Çalışkan və Barnet rayonunun meri Zahra Beg Azərbaycan diasporunun ölkənin ictimai və mədəni həyatında oynadığı roldan danışıb, bu cür tədbirlərin müxtəlif icmalar arasında əlaqələrin möhkəmləndirilməsi, mədəni müxtəlifliyin təşviqi və qarşılıqlı anlaşmanın inkişafı baxımından əhəmiyyətini qeyd edib.Britaniya Azərbaycanlıları Assosiasiyasının sədri Hafiz Baxşəliyev isə Zəfər Gününün Azərbaycan xalqı üçün qürur və birlik günü olduğunu bildirib. O, Vətən uğrunda canlarından keçən şəhidlərin xatirəsini ehtiramla yad edib, qazilərə şəfa diləyib. H.Baxşəliyev qeyd edib ki, əldə olunan Qələbənin arxasında Azərbaycan xalqının birliyi, əsgərlərin cəsarəti və şəhid ailələrinin fədakarlığı dayanır. Onun sözlərinə görə, Zəfəri qazanmaq nə qədər böyük şərəfdirsə, onun dəyərini qorumaq da bir o qədər böyük məsuliyyətdir.tədbirin bədii hissəsində Britaniyada yaşayan sənətçilər Emiliya Yaqubova, Fərhad Amiri və Gülşən Akın, eləcə də “Urmiya” ansamblı çıxış edərək Azərbaycan xalq və bəstəkar mahnılarını, müxtəlif musiqi əsərlərini səsləndiriblər. Xoreoqraf Səkinə Muxtarlının nümayiş etdirdiyi milli rəqslər və təqdim olunan konsert proqramı iştirakçılar tərəfindən maraqla qarşılanıb. Aytən Abbaslı AZƏRTAC-ın xüsusi müxbiri London
