Bizə hüquqşünaslar yox, aqronomlar lazımdır. Vaxtilə nazirlərdən biri tərəfindən səsləndirilən bu fikri xatırladan deputat Qüdrət Həsənquliyev Azərbaycanda kənd təsərrüfatı sahəsində yüksək ixtisaslı kadrlara böyük ehtiyac olduğunu açıqlayıb. Qüdrət Həsənquliyev bu fikirləri Milli Məclisin iclasında çıxışı zamanı səsləndirib.
Deputat hesab edir ki, mövcud kadr problemini beş il ərzində həll etmək mümkün olmayacaq.
Deputat bildirib ki, sovet dövründə Azərbaycanda ali təhsil müəssisələri arasında İqtisad Universiteti və Gəncədə yerləşən indiki Azərbaycan Dövlət Aqrar Universiteti xüsusi yer tuturdu.
O universitetlərin beynəlxalq reytinqlərinə də toxunub. Bildirib ki, İqtisad Universiteti dünya reytinqində 634-cü, Azərbaycan Dövlət Aqrar Universiteti isə 565-ci yerdə qərarlaşıb.
“Bu müqayisəni ona görə aparıram ki, Aqrar Universitetdə də vəziyyəti dəyişmək mümkündür və bunun üçün sadəcə olaraq ciddi işlər görülməlidir”, - deputat bildirib.
Qüdrət Həsənquliyev İqtisad Universitetində bəzi ixtisaslar üzrə keçid ballarının 600-dən yüksək olduğunu, Aqrar Universitetdə isə kənd təsərrüfatı üçün vacib ixtisaslarda bu göstəricinin xeyli aşağı qaldığını diqqətə çatdırıb.
O, bu ilin qəbul göstəricilərini misal gətirərək bildirib ki, aqronomluq ixtisası üzrə keçid balı 169,6, aqromühəndislik üzrə 177,2, su bioehtiyatları və akvakultura üzrə 151,5, baytarlıq təbabəti üzrə 153,4, bitki mühafizəsi üzrə isə 178,1 olub.
“Yəni bu cür aşağı ballar toplayan biliyə malik uşaqlarla düşünmürəm ki, bu sahədə köklü dəyişikliklərə nail ola bilərik. Əgər doğrudan da bu universitet ciddi şəkildə yenidən qurulmasa, orada ciddi islahatlar aparılmasa”, - deputat vurğulayıb.
O, vaxtilə nazirlərdən birinin “bizə hüquqşünaslar yox, aqronomlar lazımdır” fikrini səsləndirdiyini xatırladıb.
“Əlbəttə, ölkəyə hüquqşünaslar da lazımdır. Ona görə hüquqi dövlət qurmadan aqrar sahəni də inkişaf etdirmək çox çətindir”, - Həsənquliyev əlavə edib.
Deputatın sözlərinə görə, aqrar sahədə mütəxəssis hazırlığı məsələsinin Nazirlər Kabinetinin iclasında müzakirə olunması ilə bağlı mediada məlumatla rastlaşmayıb. O hesab edir ki, bu istiqamətdə kadr hazırlığına xüsusi diqqət ayrılmalıdır.
“Yəni bu, hökumətin qarşısında duran ən mühüm vəzifələrdən biri olmalıdır. Yalnız bu yolla biz bu sahədə vəziyyəti dəyişə bilərik”, - deputat bildirib.
Qüdrət Həsənquliyev qeyd edib ki, hazırda aqroparklarda, heyvandarlıq komplekslərində və bitkiçilik təsərrüfatlarında çalışan yüksək ixtisaslı mütəxəssislərin əksəriyyəti xaricdən dəvət olunur.
“İndi gedib maraqlansanız, mən şəxsən maraqlanmışam, bizim bütün aqroparklarda, heyvandarlıq komplekslərində, bitkiçilik təsərrüfatlarında çalışan mütəxəssislərin, yüksək ixtisaslı mütəxəssislərin əksəriyyəti, xüsusilə də Türkiyədən gələn mütəxəssislərdir”, - o deyib.
Deputat əlavə edib ki, aqromühəndislik sahəsi üzrə mütəxəssislər İrandan da Azərbaycana dəvət olunur.
Həsənquliyev çıxışının sonunda aqrar sahədə kadr çatışmazlığının aradan qaldırılması üçün universitetdə əsaslı islahatların aparılmasının və mütəxəssis hazırlığına dövlət səviyyəsində diqqət ayrılmasının vacibliyini vurğulayıb.