Bakı, 3 noyabr, AZƏRTAC Süni intellekt texnologiyalarının sürətli inkişafı dünyada elektrik enerjisinə olan tələbatı əhəmiyyətli dərəcədə artırır. Xüsusilə süni intellekt modellərinin təlimi və işlədilməsi üçün böyük hesablama gücünə ehtiyac duyan məlumat mərkəzləri yüksək həcmdə enerji istehlak edir. Bu tendensiya qlobal enerji bazarında yeni imkanlar və strateji dəyişikliklər yaradır.Bu sözləri AZƏRTAC-a açıqlamasında süni intellekt üzrə ekspert Dilarə Zamanova deyib.Ekspert bildirib ki, Azərbaycan üçün bu proses həm təbii qaz, həm də elektrik enerjisi ixracı baxımından əlavə imkanlar formalaşdıra bilər: “Süni intellekt infrastrukturu genişləndikcə Avropa və digər regionlarda etibarlı enerji təchizatına tələbat arta bilər. Azərbaycanın coğrafi mövqeyi, enerji resursları və mövcud ixrac infrastrukturu bu istiqamətdə ölkənin rolunu gücləndirmək üçün potensial yaradır. Bununla yanaşı, süni intellektin inkişafı enerji təchizatında fasiləsizliyin və dayanıqlılığın əhəmiyyətini daha da artırır. Məlumat mərkəzləri sutka ərzində sabit elektrik enerjisinə ehtiyac duyduğundan enerji istehsalçılarından daha etibarlı və çevik təchizat sistemləri tələb olunur. Bu baxımdan Azərbaycanın enerji infrastrukturunun genişləndirilməsi, regional enerji bağlantılarının gücləndirilməsi və elektrik enerjisi ixracı imkanlarının artırılması xüsusi əhəmiyyət daşıya bilər. Digər mühüm istiqamət isə yaşıl enerjidir. Beynəlxalq texnologiya şirkətləri və məlumat mərkəzləri karbon emissiyalarını azaltmaq məqsədilə getdikcə daha çox bərpaolunan enerji mənbələrinə üstünlük verirlər”. D.Zamanova qeyd edib ki, Azərbaycanın külək və Günəş enerjisi potensialı bu tendensiyadan faydalanmaq üçün imkan yaradır: “Xüsusilə Xəzər dənizinin külək enerjisi potensialının qiymətləndirilməsi və Qarabağ, Şərqi Zəngəzur və Naxçıvanda yaşıl enerji layihələrinin inkişafı gələcək ixrac imkanlarına töhfə verə bilər. Digər tərəfdən, bu fürsətdən səmərəli istifadə etmək üçün yalnız ənənəvi enerji ixracına güvənmək kifayət deyil. Bərpaolunan enerji mənbələrinin inkişafı, elektrik enerjisi istehsalının artırılması, ötürücü infrastrukturun modernləşdirilməsi və enerji səmərəliliyinin yüksəldilməsi vacibdir. Eyni zamanda, Azərbaycanın öz ərazisində məlumat mərkəzlərinin yaradılması və rəqəmsal infrastrukturun inkişafı da yeni iqtisadi dəyər formalaşdıra bilər. Nəticə etibarilə, süni intellektə artan qlobal tələbat Azərbaycan üçün enerji ixracını şaxələndirmək və beynəlxalq enerji bazarında mövqeyini genişləndirmək imkanı yaradır. Lakin bu imkanın real iqtisadi üstünlüyə çevrilməsi uzunmüddətli investisiyalardan, texnoloji inkişafdan və düzgün enerji strategiyasından asılı olacaq. Azərbaycanın qarşısında duran əsas vəzifə artan enerji tələbatını yalnız ixrac gəlirlərinin artırılması kimi deyil, həm də ölkənin rəqəmsal iqtisadiyyatının və sənaye potensialının inkişafı üçün strateji fürsət kimi qiymətləndirməkdir”.
