Bakı, 29 oktyabr, AZƏRTAC Heydər Əliyev Fondu və IDEA İctimai Birliyinin təşkilatçılığı ilə oktyabrın 30-dan noyabrın 1-dək keçiriləcək “Bakıya uçuş. İncəsənət həftəsonu. Gələcəyi İNDİ duy” festivalında amerikalı rəssam Cudi Çikaqo “Qadınlar dünyanı idarə etsəydi, necə olardı?” adlı banner layihəsi ilə iştirak edəcək. Festival çərçivəsində, həmçinin “Təbiət danışanda – Varislər” immersiv sərgisi təqdim olunacaq.AZƏRTAC-a müsahibəsində Cudi Çikaço layihənin yaranma tarixindən və əsas ideyasından, “Dior”un keçmiş kreativ direktoru Mariya Qratsiya Kyuri ilə əməkdaşlığından, qadın və kişi bərabərliyi mövzusundan, eləcə də əsərini Bakıda təqdim etməyin onun üçün əhəmiyyətindən danışıb.- “Qadınlar dünyanı idarə etsəydi, necə olardı?” layihəsinin ideyası necə yarandı?- Bu araşdırmanın ilk izlərini 1970-ci illərdə yaratdığım işlərdə görmək mümkündür. Həmin dövrdə Feminist İncəsənət Hərəkatını yaratmaqla incəsənət tarixini yenidən yazmağa, tarix və mədəniyyəti qadınların təcrübəsi prizmasından təqdim etməyə çalışırdım. Qadınların səsinin eşidildiyi, tarixlərinin silinmədiyi və gender bərabərliyinin təmin olunduğu dünyanın necə olacağı barədə düşünməyə başladım.Bu suallar zamanla inkişaf etdi və müxtəlif layihələrdə öz əksini tapdı. 2002-ci ildə Çində Qızıl Ordunun 1934–1936-cı illərdəki tarixi Uzun Yürüşünün adını daşıyan layihədə iştirak etdim. “Uzun Yürüş – gəzən vizual nümayiş” layihəsi tarixi marşrut boyunca 20 məkanın yenidən canlandırılmasını nəzərdə tuturdu. Hər məkanda həmin yerə xas vizual təqdimatlar və müzakirələr təşkil edilirdi.Məhz bu layihə çərçivəsində “Qadınlar dünyanı idarə etsəydi, necə olardı?” layihəsinə başladım. Çinli qadın rəssamları qadınların idarə etdiyi dünya ilə bağlı təkliflər hazırlamağa dəvət etdim. Məqsəd onların ortaq baxışını fərdi təsəvvürlər və mövcud reallıqla müqayisə etmək idi. -“Dior”un kreativ direktoru Mariya Qratsiya Kyuri ilə əməkdaşlıq layihənin inkişafına necə təsir göstərdi?- Mariya Qratsiya Kyuri ilə əməkdaşlıq layihənin inkişafında mühüm rol oynadı. Layihənin başlanğıcında uzun müddətdir düşündüyüm monumental qadın və ya ilahi fiqur ideyası dayanırdı. Bu ideya ilk dəfə 1970-ci illərdə yaranmışdı. Kyuri və “Dior” 2020-ci ilin yaz-yay Haute Couture kolleksiyasının Parisdəki nümayişi üçün ideyanı görünməmiş miqyasda həyata keçirməyə imkan verən dəstək və baxış təqdim etdilər.Bu əməkdaşlıq layihəyə həyatım boyu görəcəyimi heç düşünmədiyim bir miqyas qazandırdı. Layihə moda dünyasının hüdudlarını aşaraq müstəqil şəkildə inkişaf etməyə başladı.- Layihə tamaşaçıları hansı suallar ətrafında düşünməyə dəvət edir?- Bu gün üzləşdiyimiz problemlər baxımından aktual olan bir sıra suallar irəli sürürəm. Məncə, rəssamın rolu bütün canlılar üçün daha yaxşı dünya təsəvvür etməyimizə kömək etmək, hətta narahatlıq doğuran suallar verməkdir.Bir daha vurğulamaq istəyirəm ki, matriarxiya ilə maraqlanmıram. Məni düşündürən bərabərlikdir. Bannerlərdə belə suallar yer alır: “Qadınlar dünyanı idarə etsəydilər, qadınlarla kişilər bərabər olardılarmı?”, “Uşaqları həm qadınlar, həm də kişilər böyüdərdilərmi?”, “Planet qorunardımı?”.Başqa sözlə, dünyaya qayğı, himayə və paylaşma prinsiplərinə əsaslanan qadın baxışı hakim olsaydı, bu, bütövlükdə dünyaya necə təsir edərdi? -Layihəni Azərbaycanın zəngin mədəni irsi və Bakının müasir incəsənət mühiti fonunda “Art Weekend 2026” proqramında təqdim etmək sizin üçün nə ifadə edir?- İyirmi beş il əvvəl Çinin ucqar bölgələrindən biri olan Luqu gölündə başladığım layihənin inkişaf edərək dünyanın müxtəlif yerlərinə yayılması məni çox həyəcanlandırır. İlk bannerlərdə səsləndirdiyim sualların müxtəlif mədəniyyətlərdən olan bu qədər insana yaxın olacağını heç təsəvvür etməzdim.Baş verənlər incəsənətin dialoqa təkan vermək və insanlar arasındakı fərqləri aşmağa kömək etmək baxımından nə qədər əhəmiyyətli ola biləcəyini göstərir. “Qadınlar dünyanı idarə etsəydi, necə olardı?” layihəsinə verilən minlərlə cavab bütün dünyada dəyişməyən bir ehtiyacı üzə çıxarır: daha bərabər və ədalətli dünyaya nail olmaq üçün qadınların səsi mədəni dialoqun bir hissəsinə çevrilməlidir. Görünür, bu, bir çox insanın arzuladığı dünyadır.