Bakı, 19 noyabr, AZƏRTAC Yeni texnologiyanın inkişafı dünyamızı tez dəyişir və süni intellekt strateji resursa çevrilir ki, bu da ordulara, iqtisadiyyata, ictimai həyatın bütün sahələrinə təsir göstərir.AZƏRTAC xəbər verir ki, bu sözləri Bakıda “Kiberdiplomatiya üzrə Beynəlxalq Konfrans Azərbaycan 2026: Süni intellekt dövründə güc və təsir” mövzusunda keçirilən konfransın panel iclasında İnsidentlərə Cavab və Təhlükəsizlik Qrupları Forumunun icraçı direktoru Kris Qibson deyib. O bildirib ki, internetin təsiri əhəmiyyətli olduğu üçün şirkətlər və dövlətlər bu sahədə strateji muxtariyyət əldə etmək istəyirlər: “Bu təbiidir və başadüşüləndir. Lakin əməkdaşlıq da zəruridir və bu məqamda kiberdiplomatiyanın vacibliyi ortaya çıxır. Kiberdiplomatiya inkişaf etdirilməli və qarşılıqlı əlaqələr gücləndirilməlidir. İri texnoloji şirkətlər böyük gücə və imkanlara malikdirlər, onların monopoliyası kiberməkanı nəzarətdə saxlama imkanı verir. Bu baxımdan risklərin idarə olunması üçün əməkdaşlıq əlaqələrini artırmaq lazımdır”, - deyə o nəzərə çatdırıb.Kris Qibson deyib: “Bu gün konfransda müzakirə olunan məsələlər yeni çağırışları daha aydın başa düşməyə imkan verir. Heç bir dövlət təkbaşına interneti nəzarət altında saxlaya bilməz ki, bu da əməkdaşlığa böyük stimul verir. Bu gün dünyada baş verən geosiyasi gərginlik dövlətlərin qarşılıqlı etimadını itirir. Belə olan vəziyyətdə kiberməkanda əməkdaşlıq da çətinləşir. Buna baxmayaraq, ümumi riskləri azaltmaq üçün əməkdaşlıq kanalları qurulmalıdır. Kibertəhlükə bir neçə saniyə ərzində baş verir, sonra onun analizi uzun zaman tələb edir. Bütün bunlar nəzərə alınmalıdır və kiberdiplomatiya inkişaf etdirilməlidir. Bunun üçün beynəlxalq əməkdaşlıq olmalıdır”.