Bakı, 18 noyabr, AZƏRTAC Azərbaycan artıq Avropa üçün yalnız enerji resursları ixrac edən ölkə deyil, həm də Cənubi Qafqazda sabitliyin təmin olunmasında, Avropanın enerji təhlükəsizliyində və Avrasiya nəqliyyat-kommunikasiya əlaqələrinin inkişafında mühüm rol oynayan strateji aktordur.Bunu AZƏRTAC-a açıqlamasında Türk İslam Araşdırmaları Mərkəzinin sədri, siyasi ekspert Telman Nüsrətoğlu bildirib.Ekspertin sözlərinə görə, Prezident İlham Əliyevin həyata keçirdiyi məqsədyönlü xarici siyasət, yüksək diplomatik məharət və Azərbaycanın beynəlxalq münasibətlər sistemində artan nüfuzu ölkəmizin Avropa üçün əhəmiyyətini daha da artırır. “Bu baxımdan, Azərbaycan-Avropa münasibətlərinə yalnız enerji və iqtisadi əməkdaşlıq müstəvisində deyil, daha geniş geosiyasi və strateji kontekstdə yanaşmaq lazımdır. Avropa İttifaqı Azərbaycan üçün də mühüm tərəfdaşdır. Bu əməkdaşlıq investisiyalar, müasir texnologiyalar, ticarət, enerji bazarlarına çıxış və beynəlxalq siyasi münasibətlər baxımından xüsusi əhəmiyyət daşıyır. Enerji təhlükəsizliyi, nəqliyyat bağlantıları və regional sabitlik məsələlərində Azərbaycan Avropa üçün açar ölkələrdən biridir. Xəzər dənizinin enerji potensialından istifadə, günəş və külək enerjisi layihələrinin inkişafı, yaşıl enerjinin Avropa bazarlarına çatdırılması, Qara dənizin dibi ilə elektrik kabelinin çəkilməsi, rəqəmsal infrastruktur və yaşıl iqtisadiyyat bu istiqamətdə əsas əməkdaşlıq sahələridir”, - deyə mərkəzin sədri qeyd edib.Ekspertin fikrincə, Azərbaycanın coğrafi mövqeyi, enerji resursları və balanslaşdırılmış xarici siyasəti həmin layihələrin həyata keçirilməsi üçün mühüm imkanlar yaradır. Avropa ölkələrinin Azərbaycanla əməkdaşlığı genişləndirmək marağı da məhz bu reallıqlarla sıx bağlıdır.Telman Nüsrətoğlu Orta Dəhlizin inkişafının Azərbaycan-Avropa münasibətlərinə yeni geoiqtisadi məzmun qazandırdığını da diqqətə çatdırıb. Onun sözlərinə görə, Çin və Mərkəzi Asiyadan Xəzər dənizi, Azərbaycan və Gürcüstan üzərindən Türkiyəyə, oradan isə Avropaya uzanan bu marşrut Avrasiyanın iqtisadi və geosiyasi xəritəsində yeni reallıq formalaşdırır. O qeyd edib ki, Azərbaycanın Xəzər dənizindəki strateji coğrafi mövqeyi, Bakı Beynəlxalq Dəniz Ticarət Limanının imkanları, Bakı-Tbilisi-Qars dəmir yolunun fəaliyyəti, Türkiyə ilə müttəfiqlik münasibətləri, eləcə də Mərkəzi Asiyanın türk dövlətləri ilə siyasi və iqtisadi əlaqələrin dərinləşməsi ölkəmizin tranzit və logistika potensialını artırır. Mərkəz sədri hesab edir ki, Orta Dəhlizin inkişafı Avropa üçün alternativ təchizat marşrutlarının genişləndirilməsi, ticarət əlaqələrinin şaxələndirilməsi və iqtisadi təhlükəsizliyin möhkəmləndirilməsi baxımından xüsusi əhəmiyyət daşıyır: “Bu prosesdə Azərbaycan sadəcə tranzit ölkə deyil, Avrasiyanın yeni iqtisadi bağlantılarının formalaşmasında fəal iştirak edən strateji tərəfdaşdır. 2026-cı ildə Azərbaycanla Avropa İttifaqı və Böyük Britaniya arasında münasibətlərin yeni mərhələsinin formalaşması üçün əlverişli imkanlar mövcuddur. Enerji, nəqliyyat, yaşıl iqtisadiyyat, rəqəmsal texnologiyalar və regional təhlükəsizlik sahələrində əməkdaşlığın genişlənməsi əlaqələrin daha çoxşaxəli xarakter almasına şərait yarada bilər. Cənubi Qafqazda davamlı sülhün təmin edilməsi və regional kommunikasiyaların açılması da Azərbaycanın Avropa ilə strateji əməkdaşlığının əhəmiyyətini artıran əsas amillərdəndir”.