UEFA Millətlər Liqasının A Liqasının 1-ci qrupunda sonuncu turun oyunları keçirilib.
Bordo şəhərindəki “Matmut Atlantique” stadionunda baş tutan qarşılaşmada Fransa millisi Türkiyə yığmasını 2:1 hesabı ilə məğlub edib.
Görüşün ilk hissəsində hesab açılmayıb. Fasilədən sonra isə Fransa millisi üstünlüyü ələ alıb. 49-cu dəqiqədə türkiyəli müdafiəçi Emirhan Topçunun avtoqolu meydan sahiblərini önə keçirib.
Oyunun 80-ci dəqiqəsində Rayan Şerkinin ötürməsindən sonra Junior Krupi fərqi iki topa çatdırıb. Türkiyə millisi 90-cı dəqiqədə Abdülkərim Bardakcının qolu ilə fərqi azaltsa da, hesabı bərabərləşdirə bilməyib. Bu qolda Arda Gülər məhsuldar ötürmə ilə yadda qalıb.
Qarşılaşmada topa sahib olma göstəricisində Fransa 60 faizlik üstünlük əldə edib. Meydan sahibləri qapıya 8 dəqiq zərbə endirdiyi halda, Türkiyə millisi 3 dəfə çərçivəyə dəqiq zərbə vurub.
Bu qələbədən sonra xallarının sayını 13-ə çatdıran Fransa yığması qrup mərhələsini 4 qələbə, 1 heç-heçə və 1 məğlubiyyətlə başa vuraraq 1/4 finala vəsiqəni təmin edib.
Türkiyə millisi isə turnirdə uğursuz çıxış edib. Baş məşqçi Sergen Yalçının rəhbərlik etdiyi komanda keçirdiyi 6 oyunun hamısında məğlub olaraq xalsız qalıb. Türkiyə yığması bu matçlarda 4 qol vurub, qapısında isə 15 top görüb.
Qeyd edək ki, Türkiyə millisi A Liqasında yerini qorumaq üçün pley-off mərhələsində mübarizə aparmalı olacaq.