Tovuz, 14 noyabr, AZƏRTAC Tovuz rayonunda Uşaq Hüquqları Aylığı çərçivəsində “Uşaq hüquqlarını qoruyaq” mövzusunda maarifləndirici tədbir təşkil olunub.AZƏRTAC-ın bölgə müxbiri xəbər verir ki, tədbir iştirakçıları əvvəlcə Ümummilli Lider Heydər Əliyevin və Azərbaycanın ərazi bütövlüyü uğrunda şəhid olan qəhrəmanlarımızın xatirəsini bir dəqiqəlik sükutla yad ediblər.Tədbirdə Tovuz Rayon İcra Hakimiyyətinin, Qazax-Tovuz Regional Gənclər və İdman İdarəsinin Tovuz rayon sektoru və Tovuz Rayon Polis Şöbəsinin məsul əməkdaşları, ictimaiyyət nümayəndələri və məktəblilər iştirak ediblər.Çıxış edən Tovuz Rayon İcra Hakimiyyətinin məsul əməkdaşı Aqşin Həsənov uşaq hüquqlarının müdafiəsi və təşviqinin dövlət siyasətinin prioritet istiqamətlərindən biri olduğunu bildirib. Uşaqların hüquqlarının qorunması, sağlam və təhlükəsiz mühitdə böyüməsi, təhsil alması və hərtərəfli inkişafı üçün zəruri şəraitin yaradılmasının vacibliyini vurğulayıb. Bu istiqamətdə ailənin, təhsil müəssisələrinin, dövlət qurumlarının və bütövlükdə cəmiyyətin üzərinə mühüm vəzifələrin düşdüyünü diqqətə çatdırıb.Qeyd olunub ki, hər il olduğu kimi, bu il də BMT-nin Uşaq Hüquqları Konvensiyasının qəbul edilməsinin ildönümü ərəfəsində, oktyabrın 20-dən noyabrın 20-dək ölkəmizdə Uşaq Hüquqları Aylığı elan edilib. Aylığın məqsədi uşaq hüquqlarının müdafiəsi sahəsində görülən işlərin təbliği, ictimaiyyətin məlumatlılığının artırılması və bu istiqamətdə diqqətin gücləndirilməsidir.Digər natiqlərin çıxışlarında da uşaqların hüquq və vəzifələri, onların zorakılıqdan və digər hüquq pozuntularından müdafiəsi, təhlükəsizliyinin təmin olunması, hüquqi maarifləndirmənin gücləndirilməsi, eləcə də ictimai həyatda fəal iştirakının təşviqi məsələləri diqqətə çatdırılıb.Tədbir məktəblilərlə interaktiv müzakirələrlə davam edib. Şagirdlərin mövzu ilə bağlı sualları cavablandırılıb, fikir və təklifləri dinlənilib. Müxbir-Ruslan Novruzoğlu
