Türkiyənin tanınmış ziyalılarından biri, AK Partiyanın Mərkəzi İdarə Heyətinin üzvü, professor Zakir Avşar Azərbaycan-Türkiyə əlaqələri ilə bağlı yazı qələmə alıb. Aktuallığını nəzərə alaraq, yazını təqdim edirik:
Türkiyə ilə Azərbaycan arasındakı münasibətlər klassik diplomatik əlaqələrin və dövlətlərarası əməkdaşlığın çox fövqündə dayanan, tarixi dərinliyi, mədəni davamlılığı və güclü tale ortaqlığını özündə ehtiva edən müstəsna qardaşlıq nümunəsidir.
Bu münasibətlərin təməlində tarix, mədəniyyət, dil, ortaq dəyərlər və güclü könül bağı dayanır.
Prezidentimiz Rəcəb Tayyib Ərdoğanın da hər fürsətdə vurğuladığı kimi, Türkiyə və Azərbaycan bir-birinə qopmaz tellərlə bağlı iki qardaş dövlətdir.
Bu qardaşlıq ötəri siyasi yaxınlaşmaların və ya dövrün şərtlərindən doğan maraqların məhsulu deyil, tarixi təcrübənin və ortaq gələcək idealının formalaşdırdığı köklü birlikdir.
Prezidentimizin Qarabağ Zəfərinin altıncı ildönümü münasibətilə Şuşaya səfəri və burada verdiyi mesajlar bu münasibətlərin mahiyyətini və strateji əhəmiyyətini bir daha ortaya qoymuşdur.
Türkiyənin Azərbaycanın haqq mübarizəsində və savaşında nümayiş etdirdiyi həmrəylik iki ölkə arasındakı qardaşlığın yalnız sözlərdə qalmadığını, lazım gəldikdə konkret siyasi iradəyə və güclü dövlət həmrəyliyinə çevrildiyini göstərmişdir.
Qəhrəman Azərbaycan əsgərinin qanı bahasına, Prezident və Ali Baş Komandan İlham Əliyevin rəhbərliyi altında qazanılan Qarabağ Zəfəri Azərbaycanın ərazi bütövlüyü və suverenlik hüquqları baxımından tarixi dönüş nöqtəsi olmaqla yanaşı, Türk dünyasının ortaq yaddaşında da mühüm yer tutmuşdur.
Şuşada nümayiş etdirilən birlik bu ortaq yaddaşın gələcəyə daşınması baxımından güclü rəmzi məna daşıyır.
Türkiyə–Azərbaycan münasibətlərinin ən səciyyəvi xüsusiyyətlərindən biri iki ölkənin fərqli dövlət strukturlarına və institusional sistemlərə malik olmasına baxmayaraq, ortaq strateji baxış formalaşdıra bilməsidir.
Bu gerçəklik dövlətlərarası münasibətlərdə institusional fərqliliklərin ortaq hədəflərə mane olmadığını, əksinə, qarşılıqlı etimad və siyasi iradə sayəsində güclü əməkdaşlıq zəmininin yaradıla biləcəyini göstərir.
Prezidentimizin ifadə etdiyi tale ortaqlığı və qardaşlıq haqqı bu münasibətlərin əsas istinad nöqtələrini təşkil edir.
Həqiqətən də, iki ölkə sevincdə də, kədərdə də bir-birinin yanında dayanmağı bacaran, regional və beynəlxalq hadisələr qarşısında ortaq mövqe formalaşdıra bilən güclü həmrəylik anlayışına malikdir.
Bu qardaşlığın strateji ölçüsü enerji, nəqliyyat, infrastruktur və iqtisadi əməkdaşlıq sahələrində həyata keçirilən layihələrlə daha da dərinləşir.
Türkiyə ilə Azərbaycan arasındakı bağlantılar yalnız iki ölkənin iqtisadi inkişafına töhfə verməklə kifayətlənmir, Qafqazdan Anadoluya, oradan isə Avropaya uzanan geniş coğrafiyanın iqtisadi, ticarət və logistika imkanlarını da genişləndirir.
Enerji təhlükəsizliyi, nəqliyyat dəhlizləri və regional infrastruktur sərmayələri iki ölkənin beynəlxalq sistemdəki mövqeyini gücləndirən mühüm amillərdir.
Bu çərçivədə Türkiyə–Azərbaycan əməkdaşlığı regional sabitliyin və iqtisadi inteqrasiyanın inkişafına töhfə verən mühüm strateji tərəfdaşlıq xarakteri daşıyır.
Qarabağın yenidən qurulması və inkişafı da qardaşlığın əməli nəticələrinin göründüyü mühüm sahələrdən biridir.
Türkiyənin Azərbaycanın işğaldan qurtuluş və azadlıq mübarizəsində göstərdiyi həmrəyliyi bölgənin yenidən dirçəldilməsi və inkişafı prosesində də davam etdirməsi bu tərəfdaşlığın uzunmüddətli mahiyyətini ortaya qoyur.
Türkiyə–Azərbaycan qardaşlığının qorunması və gücləndirilməsi düzgün ünsiyyətin, qarşılıqlı etimadın və ortaq məsuliyyət duyğusunun daim canlı saxlanılmasını tələb edir.
Prezidentimizin dezinformasiyaya qarşı diqqətli olmaq, şayiələrə və əsassız iddialara etibar etməmək, məsələləri birbaşa, səmimi və açıq ünsiyyət kanalları vasitəsilə həll etmək barədə xəbərdarlıqları bu baxımdan böyük əhəmiyyət daşıyır.
İki ölkə arasındakı münasibətlərin dərinliyi nəzərə alındıqda, ayrı-ayrı hadisələrin və ya qərəzli yozumların bu tarixi və strateji bütövlüyə kölgə salmasına imkan verilməməlidir.
Bəzilərinin haqq tərəfdarı libasına bürünüb araya fitnə odu salmaq, iki ölkəni bir-birindən uzaqlaşdırmaq cəhdlərinin arxasında nələrin dayandığını, bu niyyətlərin əsl mahiyyətini yaxşı görmək lazımdır.
Qardaşlıq haqqının tələbi fərqlilikləri böyütmək deyil, qarşılıqlı anlayış və məsləhətləşmə yolu ilə ortaq iradəni daha da gücləndirməkdir.
Türkiyə ilə Azərbaycanın yaxınlaşması Türk dünyasının gələcəyi baxımından da xüsusi məna daşıyır.
Türk Dövlətləri Təşkilatı çərçivəsində inkişaf edən əməkdaşlıq ortaq mədəni irsin diplomatik, iqtisadi, elmi və institusional sahələrdə daha möhkəm zəminə daşınmasına imkan yaradır.
Türkiyə ilə Azərbaycanın nümayiş etdirdiyi həmrəylik Türk dövlətləri arasındakı inteqrasiya iradəsinə öncüllük edən mühüm nümunədir.
Bu çərçivədə iki ölkənin birgə hərəkət etmək qabiliyyəti regional sülhün, sabitliyin və rifahın inkişafı üçün mühüm imkanlar yaradır.
Türkiyə ilə Azərbaycan arasındakı qardaşlıq keçmişdən miras qalan tarixi sərvət olmaqla yanaşı, gələcəyi birlikdə qurmaq iradəsidir.
Bu münasibətlər ortaq dəyərlərin siyasi qətiyyətlə, iqtisadi əməkdaşlıqla və ictimai həmrəyliklə möhkəmləndirilməsi sayəsində hər ötən gün daha da güclənir.
Prezidentimiz Rəcəb Tayyib Ərdoğanın Şuşadan bütün dünyaya verdiyi mesajın mahiyyəti də məhz budur…
Türkiyə ilə Azərbaycan arasında ayrılıq axtaranlar iki xalqın ortaq tarixini, qarşılıqlı məhəbbətini və sarsılmaz iradəsini doğru oxuya bilmirlər.
Bu qardaşlıq keçici şərtlərin deyil, ortaq tarix şüurunun və müştərək gələcək idealının bəhrəsidir.
Türkiyə və Azərbaycan bundan sonra da bölgənin əmin-amanlığı, sabitliyi və rifahı naminə çiyin-çiyinə addımlamağa, ortaq güclərini bəşəriyyətin və Türk dünyasının gələcəyi üçün səfərbər etməyə davam edəcəklər.
Əzəldən əbədə uzanan bu qardaşlıq iki dövlətin ən qiymətli strateji gücü və gələcək nəsillərə əmanət edəcəyi ən böyük miraslardan biri olaraq yaşamağa davam edəcəkdir.