Bakı, 11 noyabr, AZƏRTACAzərbaycanın Avropanın və daha geniş coğrafiyanın enerji tələbatının ödənilməsində iştirak imkanları mərhələli şəkildə genişlənir. Bu prosesdə ölkənin yaxın qonşuları Gürcüstan və Ermənistan da mühüm regional əməkdaşlıq perspektivləri baxımından diqqət çəkir. Xəzər dənizində həyata keçirilən yeni layihələr isə enerji tərəfdaşlığının inkişafına əlavə imkanlar yaradır.Bunu AZƏRTAC-a açıqlamasında enerji bazarı üzrə analitik, “Forbes” nəşrinin baş yazarı və müstəqil məsləhətçi Qaurav Şarma bildirib.Onun sözlərinə görə, Azərbaycanın enerji sektorunda beynəlxalq əməkdaşlığın coğrafiyası kifayət qədər genişdir. “Avropalı tərəfdaşların texniki biliklərini Azərbaycanla bölüşməsi qarşılıqlı faydalı əməkdaşlığın inkişafına, enerji infrastrukturunun təkmilləşdirilməsinə və yeni layihələrin reallaşdırılmasına şərait yarada bilər. Belə əməkdaşlıq çərçivəsində enerji sektoruna milyardlarla avro həcmində investisiyaların cəlb edilməsi mümkündür. Bunun nəticəsində Azərbaycan öz enerji potensialını daha da genişləndirə, Avropa İttifaqı və xüsusilə Cənubi Avropa ölkələri isə uzunmüddətli və etibarlı enerji tərəfdaşı qazana bilər”, - deyə Qaurav Şarma əlavə edib.
