Bakı, 11 noyabr, AZƏRTAC Diasporla İş üzrə Dövlət Komitəsinin sədri Fuad Muradov Polşaya səfəri çərçivəsində bu ölkədə yaşayan soydaşlarımızla görüşüb və Koordinasiya Şurasının toplantısında iştirak edib.Dövlət Komitəsindən AZƏRTAC-a bildirilib ki, Dövlət Himninin səsləndirilməsi ilə başlayan tədbirdə Azərbaycanın ərazi bütövlüyü uğrunda canlarından keçən şəhidlərin, eləcə də noyabrın 7-də Krakov şəhərində baş vermiş hadisənin qurbanlarının xatirəsi bir dəqiqəlik sükutla yad edilib.Azərbaycanın Polşadakı səfiri Fuad İsgəndərov Zəfər Gününün tarixi əhəmiyyətindən, milli birlik və həmrəyliyin gücləndirilməsində soydaşlarımızın rolundan danışıb.Fuad Muradov da çıxışında 44 günlük Vətən müharibəsində qazanılan tarixi Qələbədən, şəhidlərin və qazilərin qəhrəmanlığından bəhs edib. Həmçinin diaspor təşkilatlarının fəaliyyətinin əlaqələndirilməsi, gənc nəslin Azərbaycanla bağlarının möhkəmləndirilməsi və xaricdə yaşayan soydaşlarımızın vahid məqsəd ətrafında birləşdirilməsinin əhəmiyyətini vurğulayıb.Tədbirdə Xalq artisti, bəstəkar Faiq Sücəddinov da çıxış edərək Zəfər Gününün xalqımızın tarixindəki əhəmiyyətini qeyd edib. Daha sonra Koordinasiya Şurasının fəaliyyəti və qarşıda duran vəzifələr müzakirə olunub, icma üzvlərinin sualları cavablandırılıb.Toplantının sonunda Polşa Azərbaycanlılarının Koordinasiya Şurasına seçkilər keçirilib. Səsvermənin nəticələrinə əsasən, Varşava və Katovitse şəhərləri üzrə koordinatorlar seçilib.
