Bakı, 11 noyabr, AZƏRTAC Cari ilin yanvar-oktyabr aylarında “Azərbaycan Dəmir Yolları” QSC (ADY) yük daşımaları üzrə artım dinamikasını davam etdirib. Bu dövrdə tranzit daşımaların, Çindən qəbul edilən blok-qatarların və Astara Terminalında və Bakı Limanında aşırılan yüklərin həcmində əhəmiyyətli artım qeydə alınıb.ADY-dən AZƏRTAC-a bildirilib ki, bu ilin 10 ayında “Azərbaycan Dəmir Yolları” QSC tərəfindən 15 milyon 691 min ton yük daşınıb. Bu, 2025-ci ilin müvafiq dövründə qeydə alınmış 13 milyon 911 min tonla müqayisədə 13 faiz çoxdur. Təkcə oktyabr ayında yükdaşımaların həcmi 1 milyon 714 min tona çataraq ötən ilin eyni ayına nisbətən 22 faiz artıb.Tranzit yükdaşımalarında da müsbət dinamika müşahidə olunub. Yanvar-oktyabr aylarında tranzit daşımaların həcmi 6 milyon 582 min ton təşkil edib ki, bu da illik müqayisədə 20 faiz artım deməkdir. Oktyabr ayında isə 817 min ton tranzit yük daşınıb. Bu göstərici ötən ilin eyni ayı ilə müqayisədə 49 faiz yüksəkdir.Konteyner daşımaları üzrə də artım qeydə alınıb. Cari ilin 10 ayında ADY tərəfindən 132 min 500 TEU konteyner daşınıb. Bu, 2025-ci ilin müvafiq dövründəki 112 min 400 TEU ilə müqayisədə 18 faiz artım deməkdir. Oktyabr ayında isə konteyner daşımalarının həcmi 16 min 200 TEU təşkil edərək ötən ilin eyni dövrünə nisbətən 67 faiz artıb.Çin istiqamətindən blok-qatarların qəbulunda da əhəmiyyətli artım əldə olunub. 2026-cı ilin 10 ayında Çindən 472 blok-qatar qəbul edilib. Bu göstərici ötən ilin müvafiq dövrü ilə müqayisədə 49 faiz çoxdur.Astara Terminalında həm aylıq, həm də 10 aylıq yükaşırma göstəriciləri üzrə ən yüksək nəticələr əldə edilib. Cari ilin yanvar-oktyabr aylarında terminalda 753 min 614 ton yük aşırılıb. Bu, ötən ilin eyni dövründəki 550 min 210 tonla müqayisədə 37 faiz artım deməkdir. Oktyabr ayında isə terminalda 122 min 216 ton yük aşırılaraq aylıq ən yüksək nəticə müəyyən edilib. Bu göstərici 2025-ci ilin oktyabr ayına nisbətən 65 faiz çoxdur.Bakı Beynəlxalq Dəniz Limanında da tarixi maksimum nəticə əldə olunub. Cari ilin 10 ayında limanda 112 min TEU-dan çox konteyner aşırılıb. Bu, limanda konteyner aşırmaları üzrə indiyədək qeydə alınmış ən yüksək göstəricidir. Konteyner aşırılmasının həcmi ötən ilin eyni dövrü ilə müqayisədə 31 faiz artıb.
