Bolnisi, 9 noyabr, AZƏRTAC Bolnisidə fəaliyyət göstərən Qafqaz Hüquq və İnteqrasiya Mərkəzində 8 Noyabr – Zəfər Günü və 9 Noyabr – Azərbaycan Bayrağı Gününə həsr olunmuş tədbir keçirilib.AZƏRTAC xəbər verir ki, tədbir əvvəlcə Azərbaycan və Gürcüstanın Dövlət himnlərinin səsləndirilməsi ilə başlayıb.Daha sonra hər iki dövlətin ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.Mərkəzin direktoru Rezo Həsənov çıxış edərək 8 Noyabr – Zəfər Gününün tarixi əhəmiyyəti barədə ətraflı məlumat verib. O bildirib ki, 2020-ci ilin sentyabrında başlayan və 44 gün davam edən Vətən müharibəsi xalqımızın 30 ilə yaxın davam edən Qarabağ həsrətinə son qoyub. Qarabağın işğaldan azad edilməsi Prezident, Müzəffər Ali Baş Komandan İlham Əliyevin qətiyyətli rəhbərliyi, Azərbaycan Ordusunun qəhrəmanlığı və xalqımızın sarsılmaz birliyi sayəsində mümkün olub.O, bu Qələbənin Azərbaycan tarixində mühüm dönüş nöqtəsi olduğunu, gələcək nəsillər üçün milli qürur, birlik və vətənpərvərlik nümunəsi təşkil etdiyini vurğulayıb.Tədbirdə çıxış edən digər iştirakçılar da Zəfər Gününün tarixi və mənəvi əhəmiyyətindən bəhs edərək, təxminən 30 il işğal altında qalmış Qarabağın azad edilməsinin Azərbaycan xalqının milli qürurunun, iradəsinin və birliyinin təcəssümü olduğunu bildiriblər. Onlar əldə olunan tarixi Qələbənin yalnız hərbi uğur deyil, həm də beynəlxalq hüququn norma və prinsiplərinə əsaslanan tarixi ədalətin bərpası baxımından mühüm əhəmiyyət daşıdığını xüsusi vurğulayıblar.Çıxışlarda, həmçinin Azərbaycanın Dövlət Bayrağının xalqımızın müstəqilliyinin, dövlətçiliyinin, milli kimliyinin və suverenliyinin rəmzi olduğu qeyd edilib. Bayrağımıza hörmətlə yanaşmağın və dövlətçilik ənənələrimizi qorumağın hər bir vətəndaşın mənəvi borcu olduğu diqqətə çatdırılıb.Sonda Qafqaz Hüquq və İnteqrasiya Mərkəzinin gəncləri tərəfindən Zəfər Gününə həsr olunmuş şeirlər səsləndirilib. Həmçinin Mərkəzin gəncləri arasında elan edilmiş “8 Noyabr – Qarabağın Əbədi Zəfəri” adlı inşa müsabiqəsində iştirak edən gənclərə sertifikatlar təqdim olunub. Xətayi Əzizov AZƏRTAC-ın xüsusi müxbiri Tbilisi
