Bakı, 9 noyabr, AZƏRTAC 8 Noyabr - Zəfər Gününün 6-cı ildönümü münasibətilə Azərbaycan Respublikasının Qətər Dövlətindəki Səfirliyi tərəfindən Doha şəhərində bayram tədbiri keçirilib.Tədbirdə Asiya ölkələrinin səfirləri və həyat yoldaşları, Togo və Malavinin Qətərdəki (eyni zamanda Azərbaycandakı) səfirləri və xanımları, Qətərin ərəb və ingilisdilli müxtəlif mətbuat orqanlarının jurnalistləri iştirak ediblər.Səfirlikdən AZƏRTAC-a bildirilib ki, səfir Adış Məmmədov tədbirdə çıxış edərək, Şanlı Qələbə ilə nəticələnən 44 günlük Vətən müharibəsinin səbəb və tarixi barədə ətraflı danışıb. O, Ermənistanın hərbi təcavüzü nəticəsində 30 il işğal altında qalan Azərbaycan ərazilərinin qüdrətli Azərbaycan Ordusunun apardığı 44 günlük müharibə ilə işğaldan təmizləndiyini və Azərbaycanın ərazi bütövlüyünün təmin olunduğunu bildirib.Səfir bildirib ki, Cənubi Qafqazın geopolitik reallığını dəyişən bu tarixi Zəfərdən dərhal sonra azad edilmiş ərazilərdə genişmiqyaslı yenidənqurma işlərinə başlanılıb. Nəticədə müasir infrastrukturlar və "ağıllı" yaşayış məskənləri salınaraq keçmiş məcburi köçkünlərin doğma torpaqlarına qayıdışı təmin edilir.Adış Məmmədov qeyd edib ki, müharibənin başa çatmasından altı il keçməsinə baxmayaraq, onun ağrılı nəticələri bu gün də hiss olunmaqdadır. Ermənistan hərbi birləşmələri tərəfindən minalanmış ərazilər Azərbaycan hökumətinin qarşısında duran ən böyük problemlərdən biridir. 2020-ci ildə müharibənin başa çatmasından 2026-cı il sentyabrın 30-dək mina partlayışları ilə bağlı 276 hadisə qeydə alınıb, nəticədə uşaqlar və qadınlar da daxil olmaqla, 441 nəfər mina qurbanına çevrilib. Bu fakt minalardan təmizləmə işlərinin aparılmasının və mina qurbanlarına yardım göstərilməsinin təxirəsalınmaz əhəmiyyətini bir daha vurğulayır. Son 30 il ərzində Azərbaycanda mina qurbanlarının ümumi sayının 3500 nəfəri ötdüyünü diqqətə çatdıran səfir onların böyük əksəriyyətinin mülki şəxslərdən, o cümlədən jurnalistlərdən ibarət olduğunu vurğulayıb.Səfir artıq münaqişənin bitdiyini, iki ölkə arasında imzalanacaq sülh sazişinin paraflandığını, Şərqlə Qərb arasında körpü rolunu oynayan Azərbaycanın regionda sülhün bərqərar olmasına öz töhfəsini verdiyini bildirib. Sonra Zəfər Günü ilə əlaqədar videoçarx göstərilib.Tədbir Azərbaycan milli yeməkləri və şirniyyatlarından ibarət ziyafətlə, milli musiqi sədaları altında davam edib. Qonaqlara "Xarıbülbül" döş nişanları hədiyyə edilib.Qeyd edək ki, Qətərin ərəbdilli “Al Sharq” , “Al Raya”, “Al Arab”, ingilisdilli “The Peninsula”, “Qatar Tribune ”qəzetlərində tədbirlə bağlı geniş materiallar yayımlanıb.
