Bakı, 4 noyabr, AZƏRTAC44 günlük Vətən müharibəsində qazanılan tarixi Zəfər Azərbaycanın ərazi bütövlüyünün və suverenliyinin tam bərpası ilə nəticələnən mühüm tarixi mərhələnin başlanğıcı oldu. 2023-cü il sentyabrın 19-20-də keçirilən lokal xarakterli antiterror tədbirləri isə bu tarixi prosesin məntiqi yekunlarından biri kimi xalqımızın yaddaşına həkk olundu. Həmin əməliyyatda iştirak edən hərbçilərimizin qəhrəmanlığı, fədakarlığı və döyüş yoldaşlarının xatirəsi bu gün də Zəfər tariximizin ayrılmaz hissəsidir. Bu fikirləri AZƏRTAC-a müsahibəsində Azərbaycan Universitetinin akademik məsləhətçisi, antiterror tədbirlərinin iştirakçısı, qazi Tural Rzayev bildirib.O, 2023-cü il sentyabrın 19-da Şuşa-Xankəndi istiqamətində gedən döyüşlərdə iştirak etdiyini söyləyib. Qazinin sözlərinə görə, həmin gün onlara Şuşa-Xankəndi yolu istiqamətində yerləşən yeddi postun ələ keçirilməsi tapşırılıb: “Sentyabrın 19-da günorta saatlarında döyüşə hazırlaşdıq. Qarşımıza yeddi postun götürülməsi vəzifəsi qoyulmuşdu. Biz də həmin istiqamətdə hərəkət etdik. Əməliyyatın əsas məqsədi Xankəndi ətrafındakı mövqelərin nəzarətə götürülməsi, separatçı silahlı birləşmələrin fəaliyyətinə son qoyulması və ərazidə təhlükəsizliyin təmin edilməsi idi. Bu, hər birimiz üçün böyük məsuliyyət tələb edən bir tapşırıq idi. “Döyüşdən təxminən bir gün keçmişdi. Mövqedə dayanmışdıq. Həmin vaxt dron vasitəsilə üzərimizə minaatan mərmisi atıldı. Partlayış nəticəsində əsgərlərimizdən bir neçəsi qəlpə yarası aldı. Təəssüf ki, yanımızda olan bir gizirimiz şəhid oldu. Bu hadisə bizim üçün çox ağır idi. Döyüşdə çiyin-çiyinə vuruşduğun, eyni səngəri, eyni təhlükəni bölüşdüyün insanı itirmək sözlə ifadə olunmayacaq bir ağrıdır. Döyüş zamanı gözlənilmədən komandirimin nəşi ilə qarşılaşdım. Bu, mənim üçün son dərəcə ağır və sarsıdıcı an idi. Yaşadığım mənəvi sarsıntıya baxmayaraq, komandirimin nəşini çiynimə alaraq döyüş zonasından çıxardım. Həmin anı heç vaxt unuda bilmərəm. Çünki o, mənim üçün yalnız komandir deyil, həm də döyüş yolunda çiyin-çiyinə olduğum silahdaşım idi”, – deyə qazi bildirib. O qeyd edib ki, müharibə insanın yaddaşında yalnız atəş səsləri, döyüş səhnələri və hərbi əməliyyatlarla qalmır. Ən çox xatırlanan məqamlar döyüş yoldaşlarının fədakarlığı, bir-birinə dayaq olması və Vətən naminə göstərdikləri iradədir. Tural Rzayevin sözlərinə görə, həmin günlərdə hər bir hərbçini irəli aparan əsas qüvvə Vətən sevgisi, torpaqlarımızın azadlığına inam və üzərinə düşən vəzifəni layiqincə yerinə yetirmək əzmi olub. O, döyüş yoldaşlarının göstərdiyi qəhrəmanlığın heç vaxt unudulmamalı olduğunu diqqətə çatdırıb. Qeyd edib ki, bu gün azad edilmiş ərazilərdə həyatın yenidən qurulması, insanların doğma yurdlarına qayıtması və dövlət suverenliyimizin tam təmin olunması həmin mübarizənin nə qədər böyük tarixi əhəmiyyət daşıdığını bir daha göstərir. “Bizim üçün Zəfər Günü sadəcə təqvimdə qeyd olunan tarix deyil. Bu gün şəhidlərimizin qanı, qazilərimizin sağlamlığı, əsgər və zabitlərimizin fədakarlığı bahasına yazılmış tarixdir. Biz yaşadığımız hadisələri gələcək nəsillərə çatdırmalıyıq ki, onlar bu torpaqların hansı mübarizə və qurbanlar hesabına azad edildiyini bilsinlər. Şəhidlərimizin xatirəsini yaşatmaq, onların əmanəti olan Vətəni qorumaq hər birimizin mənəvi borcudur”, – deyə T.Rzayev əlavə edib. Onun sözlərinə görə, Zəfər tarixinin gələcək nəsillərə çatdırılmasında təhsil müəssisələrinin, müəllimlərin və gənclərlə işləyən mütəxəssislərin də üzərinə mühüm vəzifələr düşür. Çünki Vətən sevgisi yalnız sözlə deyil, tarixi həqiqətlərin öyrədilməsi, milli yaddaşın qorunması və dövlətçilik dəyərlərinə bağlılığın aşılanması ilə formalaşır. Müxbir-Tünzalə Arazlı
