Bakı, 27 oktyabr, AZƏRTACYaxın Şərqdə müharibə səbəbindən Pakistan hökuməti Qətərdən gündəlik təxminən 900 milyon kubfut təbii qaz tədarükünün dayandırıldığını açıqlayıb. Bu vəziyyət ölkədə mövcud qaz ehtiyatlarının istehlakçılar arasında bölüşdürülməsinin məhdudlaşdırılmasına səbəb olub. Pakistan, həmçinin Omandan və Səudiyyə Ərəbistanından mayeləşdirilmiş neft qazının (LPG) idxalı imkanlarını nəzərdən keçirir.AZƏRTAC İraq xəbər agentliyinə (İNA) istinadla bildirir ki, bunu Pakistanın neft naziri Əli Pərviz Malik Milli Assambleyanın iclasında çıxışında deyib.O bildirib ki, Qətərdən tədarükün dayandırılması ölkənin qaz təminatında çətinliklər yaradıb. Nazirin sözlərinə görə, Pakistan quru sərhədləri vasitəsilə tədarükün təmin edilməsində də çətinliklərlə üzləşir, eyni zamanda qiymətlər yüksəlir.Qeyd edilib ki, Səudiyyə Ərəbistanının “Saudi Aramco” şirkəti tərəfindən müəyyən edilən və yerli istehsal qiymətləri ilə əlaqəli olan LPG-nin beynəlxalq müqavilə qiyməti bir ton üçün 705 dollara yüksəlib. Bu isə istehlakçılar üçün yanacağın bahalaşmasına səbəb olur.Əli Pərviz Malikin sözlərinə görə, qış mövsümünün yaxınlaşması təbii qazı əvəz edən yanacaqlara tələbatı artıra bilər. Hökumət tədarükün yaxşılaşdırılması və məişətdə istifadə olunan qazın əlçatanlığının təmin edilməsi məqsədilə siyasət hazırlayır. Bununla yanaşı, qiymət artımının aztəminatlı ailələrə təsirini azaltmaq üçün tədbirlər görülməsi nəzərdə tutulur.Pakistan alternativ idxal mənbələrini araşdırmaqla xarici tədarükdəki fasilələrin daxili bazara təsirini azaltmağa çalışır. Yaxın aylarda enerji tələbatının artacağı gözlənildiyindən, ölkənin qaz təminatında sabitliyin yaradılması hökumət üçün əsas məsələlərdən biri olaraq qalır.