ABŞ prezidenti Donald Trampın kürəkəni və keçmiş baş müşaviri Cared Kuşner onun telefonunun sındırılması, ərəb şeyxləri ilə gizli maliyyə əməliyyatları və Azərbaycandan köçürüldüyü iddia edilən yüz milyonlarla dollarla bağlı yayılan məlumatları təkzib edib.
Kuşner "Vanity Fair" jurnalında dərc olunan “Sövdələşmə sənədi: Cared Kuşnerin sındırılmış telefonu onun 700 milyon dollardan çox köçürmə də daxil olmaqla, gizli danışıqlarını üzə çıxardı” başlıqlı məqaləyə “X” sosial şəbəkəsində münasibət bildirib.
Məqalədə “Şahzadələr və oğrular: Cared Kuşner və Məhəmməd bin Zayedin Yaxın Şərqi yenidən formalaşdırmaq üçün gizli planı” kitabından bir hissə təqdim olunub. Həmin hissədə Niderland hökumətinin Kuşnerin telefonunu sındırdığı və onun Dubaydakı bank hesabını izlədiyi iddia edilir. Mənbənin məlumatına görə, bu hesaba Azərbaycandakı banklardan birindən milyonlarla dollar vəsait daxil olub. Kuşnerin həmin hesabdan müxtəlif şəxslərə, o cümlədən səhra komandirinə, muzdlu döyüşçüyə və keçmiş muzdlu qatillərdən birinə böyük məbləğlər köçürdüyü də iddia olunur.
Bildirilir ki, 2018-ci ildə Niderlandın Hərbi Kəşfiyyat və Təhlükəsizlik Xidməti (MIVD) Kuşnerin “iPhone X” telefonunu sındırıb. Niderland kəşfiyyatçıları bundan əvvəl telefonun Rusiya Baş Kəşfiyyat İdarəsinin (QRU) əməkdaşları tərəfindən də sındırıldığını öyrəniblər.
Telefonun məlumatlarına çıxış əldə etdikdən sonra Niderland tərəfinin Kuşnerin fəaliyyətini izləyə bildiyi iddia olunur. Məlumata əsasən, Kuşner Birləşmiş Ərəb Əmirliklərindəki "First Abu Dhabi Bank"da “Alfa” adlı hesaba qoşulub. Həmin hesabda Azərbaycandan köçürüldüyü iddia edilən təxminən 750 milyon dollar olub. Kitabın müəllifləri bu vəsaitin gizli əməliyyatların maliyyələşdirilməsi üçün ehtiyat fondu kimi istifadə edildiyini irəli sürürlər.
Bundan başqa, kitabda BƏƏ şeyxi Məhəmməd bin Zayed Al Nəhyanın və Səudiyyə Ərəbistanının vəliəhdi Məhəmməd bin Salmanın Yaxın Şərqdə qeyri-rəsmi diplomatiya aparmaq və təsir imkanlarını genişləndirmək məqsədilə azı 2 milyard dollar ayırdıqları iddia olunur.
Kuşner ittihamlara sərt cavab verdi
Cared Kuşner yayılan məlumatları qəti şəkildə təkzib edib və müəllifin irəli sürdüyü iddiaları “tamamilə ağlasığmaz” adlandırıb.
“Bu müəllifin irəli sürdüyü iddialar tamamilə ağlasığmazdır. Biz onların hər birini rəsmi şəkildə təkzib etmişik. Bu qeyri-adi ittihamları təsdiqləyən heç bir bank çıxarışı, bank köçürmələri barədə qeyd, hesab nömrəsi, əməliyyat tarixi və ya yoxlanıla bilən digər məlumat təqdim edilməyib”, - deyə Kuşner yazıb.
O, Donald Trampın ilk prezidentlik müddətində özünün dünyanın ən ciddi şəkildə araşdırılan şəxslərindən biri olduğunu xatırladıb. Kuşnerin sözlərinə görə, həmin dövrdə o, ABŞ Konqresinin və prokurorluğun çoxsaylı araşdırmalarının hədəfində olub, eyni zamanda media tərəfindən daim izlənilib.
Kuşner bu araşdırmalarla könüllü şəkildə əməkdaşlıq etdiyini və ümumilikdə 30 saatdan çox ifadə verdiyini bildirib.
“Heç bir iddia üzə çıxmadı, çünki bu hadisələrin heç biri heç vaxt baş verməyib”, - deyə o vurğulayıb.
Trampın kürəkəni "Vanity Fair" jurnalının məqaləsini jurnalist araşdırması deyil, uydurma, bədii təxəyyül və təbliğatın qarışığı kimi qiymətləndirib.
Kuşner daha əvvəl də Rusiya ilə əlaqələrə görə gündəmə gəlib
Qeyd edək ki, Cared Kuşnerin adı daha əvvəl də Rusiya ilə mümkün təmasları ilə bağlı müzakirələrdə hallanıb. 2017-ci ilin mayında "The Washington Post" qəzeti kəşfiyyat hesabatına istinadən Kuşnerlə Rusiyanın Vaşinqtondakı səfiri Sergey Kislyakın Trampın prezidentliyə keçid komandası ilə Kreml arasında “gizli və təhlükəsiz rabitə kanalı” yaratmaq imkanını müzakirə etdiklərini yazmışdı.
Bundan sonra ABŞ Konqresinin bəzi üzvləri Trampın kürəkəninin məxfi sənədlərə çıxış icazəsinin ləğv edilməsini tələb etmişdilər.
Hazırda Cared Kuşner ABŞ-ın Ukrayna münaqişəsi üzrə danışıqlar qrupunda xüsusi elçi Stiv Uitkoffla birlikdə iştirak edir. O, oktyabrın 21-də Rusiya prezidenti Vladimir Putinlə keçirilən görüşdən sonra Ukrayna ilə bağlı danışıqlarda “ümidverici irəliləyiş” əldə olunduğunu bildirib. Kuşner davamlı sülhə nail olmaq üçün imkan yarandığını da qeyd edib.
Qeyd olunan maliyyə əməliyyatları və gizli əlaqələrlə bağlı məlumatlar kitabda və "Vanity Fair" jurnalının materialında irəli sürülən iddialardır. Kuşner isə bu ittihamların hamısını rədd edir.
