Oktyabrın 23-də əmtəə bazarlarında fərqli istiqamətlər müşahidə olunur. Neft qiymətləri əvvəlki sessiyanın kəskin yüksəlişindən sonra yüksək səviyyələrdə qalır, qızıl və gümüş isə faiz gözləntilərinin təsiri ilə ucuzlaşır.
Bakı vaxtı ilə saat 08:30-da “Brent” neftinin fyuçersləri 0,2% azalaraq bir barel üçün 112,96 dollar olub. Əvvəlki sessiyada qiymət 4% yüksələrək son beş ayın ən yüksək bağlanış səviyyəsinə çatmışdı. Husilərin Səudiyyə Ərəbistanına hücumları enerji təchizatında yeni fasilələr yaranacağına dair narahatlığı artırıb. Liviyada boru kəmərindəki bağlanma nəticəsində iki yataqda hasilatın azalması da bazarın diqqətindədir. “Brent” həftəni ardıcıl üçüncü dəfə bahalaşma ilə başa vurmağa hazırlaşır.
Qiymətli metallarda isə satışlar davam edir. Saat 07:51-də spot qızıl 0,2% ucuzlaşaraq bir troya unsiyası üçün 4 016,27 dollara enib. Həftəlik itki 3,5%-ə çatıb. Gümüş 1% azalaraq 53,98 dollara düşüb. Bahalı enerji inflyasiya narahatlığını gücləndirərək ABŞ-də faizlərin uzun müddət yüksək saxlanılması gözləntilərini artırır. Bu, faiz gəliri gətirməyən qızılın cəlbediciliyini zəiflədir. İnvestorlar Federal Ehtiyat Sisteminin 27–28 oktyabr iclasını izləyirlər.
ABŞ-nin təbii qaz bazarında dörd sessiyalıq eniş dayanıb. “The Wall Street Journal”ın məlumatına görə, oktyabrın 22-də fyuçerslər 0,2% yüksələrək bir milyon Britaniya istilik vahidi üçün 2,796 dollar səviyyəsində bağlanıb. Həftəlik ehtiyat artımı gözləntilərə uyğun gəlsə də, noyabrın əvvəlinədək mülayim hava proqnozu tələbin sürətlə güclənməsi gözləntilərini məhdudlaşdırır. Ehtiyatların beşillik orta göstəricidən artıq hissəsi də azalıb.
Mis bazarında isə qısamüddətli ehtiyat artımı ilə gələcək təklif narahatlıqları yanaşı mövcuddur. ABŞ investisiya bankı “Goldman Sachs” ilin sonuna misin qiymət proqnozunu ton üçün 14 700 dollara, 2027-ci il üzrə orta qiymət gözləntisini isə 15 400 dollara yüksəldib. Bank bunu mədən təklifinin zəifləməsi və ABŞ-dən kənar bazarlarda təchizatın daralması ilə əsaslandırır. Bununla belə, Çində yüksək qiymətlər fonunda ehtiyatlı alışlar bazarın yüksəlişini məhdudlaşdıran amillərdəndir.