Tbilisi, 21 noyabr, AZƏRTAC Biz Qafqazda müharibənin nəticələrini çox yaxşı anlayırıq. İnsanların həlak olması, xüsusilə çoxsaylı hərbi qulluqçuların və mülki şəxslərin itkin düşməsi ciddi problemlərlə müşayiət olunur. İtkin düşmüş şəxslərin taleyinin aydınlaşdırılması da məhz bu problemlər sırasına daxildir. Bu, hər bir münaqişə və müharibənin qaçılmaz nəticələrindən biridir.Bu sözləri AZƏRTAC-a müsahibəsində Gürcüstanın Strateji Planlaşdırma Mərkəzinin rəhbəri, politoloq Levan Mamaladze söyləyib.O deyib: “Mən, əlbəttə ki, Azərbaycanın ərazi bütövlüyünün bərpasından və Qarabağın Azərbaycanın tərkibinə qaytarılmasından sonra Azərbaycanla Ermənistan arasında başlanmış sülh yolu ilə nizamlanma prosesini dəstəkləyirəm. Lakin bu prosesin tənzimlənməli olan çoxsaylı istiqamətləri var. Ən mühüm istiqamətlərdən biri humanitar dialoqdur. Bu çərçivədə itkin düşmüş şəxslərlə bağlı məsələlərin, onların taleyinin və bu problemlə əlaqəli bütün məqamların aydınlaşdırılması xüsusi əhəmiyyət daşıyır.Ona görə də bu istiqamətdə çox diqqətli və hərtərəfli iş aparılmalıdır. Bu prosesdə bütün tərəflər – həm Azərbaycan, həm də Ermənistan iştirak etməlidir. Məlumatlara görə, Azərbaycanda dörd mindən çox insan itkin düşmüş şəxs hesab olunur.Müvafiq komissiya çərçivəsində mütəxəssislərin iştirakı ilə dəfn yerlərinin müəyyənləşdirilməsi, ekshumasiya işlərinin aparılması, genetik ekspertizanın keçirilməsi və hər bir şəxsin kimliyinin dəqiqləşdirilməsi vacibdir. Məqsəd itkin düşmüş şəxslərin ailələrinin nəhayət cavab alması, yaxınlarının başına nələr gəldiyini bilməsidir. Bu, mövcud problemlərin humanitar yolla həlli baxımından çox mühüm məsələdir.İkinci mühüm məqam isə humanitar dialoqa və itkin düşmüş şəxslərin taleyinin aydınlaşdırılmasına həsr olunmuş belə bir konfransın keçirilməsinin əhəmiyyətidir. İlk növbədə, bu, tərəflər arasında etimadın formalaşmasına xidmət edir. Eyni zamanda, çoxsaylı və olduqca mürəkkəb problemlərin həllinə yönəlmiş siyasi iradənin və istəyin göstəricisidir.Çünki bəzən insanlıq əleyhinə cinayətlərin törədildiyi hallar da olur. İnsanlara işgəncələr verilir, onlar güllələnir, öldürülür, daha sonra isə cəsədləri kimsəsiz ərazilərdə yerləşən qəbirlərdə basdırılır. Belə hallar da baş verir.Mən bu sözləri məhz keçirilən konfransa münasibətdə işlətmək istəmirəm, lakin heç nəyi istisna etmək olmaz. Buna görə də həqiqət necə olursa-olsun, mütləq üzə çıxarılmalı və ictimaiyyətə çatdırılmalıdır. Xüsusilə də tərəflər bu problemlərin həllində maraqlı olduqları üçün itkin düşmüş şəxslərin yaxınları, qohumları və ailə üzvləri mütləq cavab almalıdırlar”, – deyə politoloq bildirib.Onun sözlərinə görə, bu məsələ hələ də həllini tapmamış digər problemlərin sülh yolu ilə nizamlanması prosesinin mühüm tərkib hissəsidir. Buna görə də bu prosesin başlanmasını dəstəkləmək lazımdır.Politoloq hesab edir ki, Beynəlxalq Qızıl Xaç Komitəsi bu sahədə böyük təcrübəyə malikdir. Onun təcrübəsindən itkin düşmüş şəxslərin taleyinin müəyyənləşdirilməsi prosesində istifadə etmək mümkündür.Levan Mamaladze ümidvar olduğunu bildirib ki, bütün çətinliklərə və hətta olduqca ağır nəticələrlə üzləşmək ehtimalına baxmayaraq, tərəflər yaxın vaxtlarda ortaq məxrəcə gələcəklər. Nəticədə itkin düşmüş şəxslərin taleyi aydınlaşdırılacaq.“Hər kəs başa düşməlidir ki, bu, mürəkkəb prosesdir. Lakin humanitar dialoq və mövcud problemlərin həlli baxımından çox mühüm əhəmiyyət daşıyır. Bu çətin məsələnin həllində hər kəsə uğurlar arzulayıram. Ümid edirəm ki, müsbət nəticələr əldə olunacaq və məsələyə aydınlıq gətiriləcək”, – deyə politoloq vurğulayıb. Xətayi Əzizov AZƏRTAC-ın xüsusi müxbiri Tbilisi