Pattinsonun Ceyms Bond seçilməsində Ceff Bezosun da rolu olub

Hollivudun ən məşhur casus obrazı Ceyms Bondun yeni ifaçısı Robert Pattinsonun seçilməsi ilə bağlı maraqlı təfərrüatlar ortaya çıxıb.

"Amazon" şirkətinin qurucusu Ceff Bezos bildirib ki, aktyorun 007 roluna təsdiqlənməsi prosesində şəxsən iştirak edib.

Bezosun sözlərinə görə, seçim mərhələsində çoxsaylı namizədlər nəzərdən keçirilib, daha sonra beş aktyor sınaq çəkilişlərinə dəvət olunub. Namizədlər xüsusi hazırlanmış dekorasiyalarda, tam kostyumda üç fərqli səhnəni canlandırıblar. Bezos və yaradıcı heyət aktyorların sınaq görüntülərini birlikdə izləyərək yekun qərara gəlib.

Maraqlı məqam ondan ibarətdir ki, seçim qrupunun ilkin yanaşması artıq dünya şöhrəti qazanmış aktyorun əleyhinə olub. Onlar Bond obrazı üçün daha az tanınan simanın seçilməsini düşünürmüşlər. Lakin Pattinsonun sınaq çəkilişləri bu tərəddüdü aradan qaldırıb. Bezos aktyorun ifasının onu inandırdığını və məhz həmin anda Pattinsonun obraz üçün düzgün seçim olduğunun aydınlaşdığını bildirib.

“Alatoran” filmləri ilə dünya şöhrəti qazanan, daha sonra “Tenet” və “Betmen” kimi layihələrdə çəkilən Pattinsonun Bond obrazına gətirəcəyi yeni yanaşma artıq kinosevərlər arasında maraq doğurur. Bu seçim həm də Bond franşizasında mühüm mərhələdir: yeni film Amazon "MGM Studios"un yaradıcı nəzarəti altında istehsal olunacaq ilk Bond ekran əsəri olacaq.