Şahzadədən ABŞ və Avropaya müəmmalı mesaj: “Yanvardan etibarən nələrsə dəyişəcək”

“İngiltərə son 10 ildir Rusiya ilə müharibə vəziyyətindədir. Ehtiyac yaranacağı təqdirdə yenidən hərbi xidmətə qayıtmağa hazıram”.

Bunu Böyük Britaniya şahzadəsi Harri “The Telegraph” qəzetinə müsahibəsində deyib.

O Rusiya-Ukrayna müharibəsi, Avropanın təhlükəsizliyi və ABŞ-ın mövqeyi ilə bağlı fikirlərini bölüşüb.

Harrinin sözlərinə görə, pilotsuz uçuş aparatlarının, güllələrin və raketlərin İngiltərə ərazisinə düşməməsi ölkənin müharibədən kənarda olduğu anlamına gəlmir.

O, Avropanın Rusiyadan gələn təhlükənin fərqində olduğunu, lakin qitə daxilində parçalanmanın daha böyük narahatlıq doğurduğunu vurğulayıb. Harri Ukraynanın təcrübəsindən öyrəniləcək çox şey olduğunu qeyd edərək, ehtiyac yaranarsa, ölkəsinə xidmət etməyə tam hazır olduğunu bildirib.

ABŞ-da keçiriləcək aralıq seçkilərə də toxunan Harri diqqətçəkən açıqlama verib: “Yanvar ayından etibarən nələrsə dəyişəcək. Hamımızın diqqəti orada olmalıdır. Avropa vahid cəbhə şəklində birləşib. ABŞ-ın burada daha çox dəstəyini görmək xoş olardı”.