Dünya və Azərbaycan niyə yaşıl enerjini seçir?

BMT-nin İqlim Dəyişikliyi üzrə Ekspert Qrupunun hesabatlarına əsasən dünya artıq qlobal istiləşmə mərhələsini keçərək, "qlobal qaynama" dövrünə qədəm qoyub. Anomal istilər, qəfil daşqınlar və quraqlıq təbiətin bizə xəbərdarlığıdır. Atmosferi çirkləndirən ənənəvi yanacaqlardan imtina edərək tükənməyən enerji mənbələrinə - günəş, külək, suya keçid artıq seçim deyil, zərurətdir.

Azərbaycan da "yaşıl inqilab"ın fəal iştirakçısıdır. Ölkəmiz 2030-cu ilə qədər elektrik enerjisinin qoyuluş gücündə bərpaolunan enerjinin payını 30 faizə çatdırmağı hədəfləyir. Xəzər dənizinin külək potensialı, eləcə də Qarabağ, Şərqi Zəngəzur və Naxçıvanın yaşıl enerji zonaları elan edilməsi bu strateji hədəfin əsas göstəriciləridir.

Lakin yaşıl gələcək təkcə böyük layihələrlə deyil, gündəlik vərdişlərimizlə başlayır. Lazımsız işıqları söndürmək, enerjiyə qənaət etmək, plastikdən uzaq durmaq kimi kiçik addımlar planetimizin xilasına böyük töhfə verə bilər.