London, 12 noyabr, AZƏRTAC Böyük Britaniya hökuməti Çaqos adalarının Mavrikiyə təhvil verilməsi istiqamətində növbəti hüquqi maneəni aradan qaldırıb.AZƏRTAC “The Independent”ə istinadla xəbər verir ki, Britaniyanın Hind okeanındakı ərazilərinin Apellyasiya Məhkəməsi Çaqos adalarının yerli sakinlərinin adalarda daimi yaşamaq hüququna malik olması barədə əvvəlki məhkəmə qərarını etibarsız hesab edib. Hakimlər bildiriblər ki, bu məsələ ilə bağlı yekun hüquqi qərar İngiltərənin Apellyasiya Məhkəməsi tərəfindən verilməlidir.Qərar Böyük Britaniyanın Leyboristlər Partiyası hökumətinin adaların Mavrikiyə təhvil verilməsi ilə bağlı razılaşmasının həyata keçirilməsinə yol açsa da, hüquqi mübahisələr davam edəcək. İşə gələn il Londonda baxılması nəzərdə tutulur. Məhkəmə qərarı, həmçinin hökumətin Mavriki ilə razılaşmasına etiraz olaraq adalardan birinə qayıdaraq orada məskunlaşan çaqosluların gələcəyini qeyri-müəyyən vəziyyətə salıb.Xatırladaq ki, Böyük Britaniyanın Baş naziri Kir Starmer 2024-cü ildə Çaqos adalarının Mavrikiyə verilməsi barədə razılığa gəlib. Razılaşmaya əsasən, Britaniya strateji əhəmiyyət daşıyan Dieqo-Qarsiya hərbi bazasından istifadəni davam etdirmək üçün 30 milyard funt sterlinq ödəməlidir. Lakin ABŞ Prezidenti Donald Trampın razılaşmaya dəstəyini geri götürməsindən sonra prosesdə gecikmələr yaranıb.Qeyd edək ki, Çaqos adalarının yerli sakinləri 1960–1970-ci illərdə hərbi bazanın təhlükəsizliyinin təmin edilməsi məqsədilə adalardan köçürülüblər. Ötən il Britaniyanın Hind okeanındakı ərazilərinin məhkəməsi mövcud şəraitin dəyişdiyini əsas gətirərək adalara qayıdan sakinlərin oradan çıxarılmasının qanunsuz olduğu və onların adalarda yaşamaq hüququna malik olduğu barədə qərar qəbul etmişdi. Aytən Abbaslı AZƏRTAC-ın xüsusi müxbiri London
