Bakı, 12 noyabr, AZƏRTAC Rəqib komandanı səfərdə məğlub etmişdik. Buna baxmayaraq, onların asanlıqla təslim olacağını gözləmirdik. Gənc komanda olmalarına baxmayaraq, mübariz ruhlu kollektivdirlər.Bu sözləri AZƏRTAC-a açıqlamasında qadın voleybolçulardan ibarət “Turan” (Tovuz) komandasının baş məşqçisi Ziya Rəcəbov Bolqarıstanın “Maritsa” kollektivi ilə keçirilən qarşılaşma barədə fikirlərini bölüşərkən deyib.Mütəxəssis 3:0 hesablı qələbəyə baxmayaraq, oyunun komandası üçün asan keçmədiyini bildirib: “Hesaba baxmayaraq, rəqib yaxşı mübarizə apardı. Xüsusilə ilk setdə ciddi çətinliklərlə üzləşdik. İkinci setdə nisbətən rahat oynadıq, lakin ümumilikdə qarşılaşma bizim üçün asan keçmədi. Bunun müəyyən qədər arxayınlıqla da əlaqəsi var idi. Ən əsası isə odur ki, komandamız CEV Çempionlar Liqasının əsas qrup mərhələsinə vəsiqə qazandı. Bu, bizim üçün çox sevindirici hadisədir. Qarşıdakı mərhələdə daha böyük motivasiya ilə mübarizə aparacağıq. Xəyallarımızdan əl çəkmək olmaz. Əminliklə deyə bilərəm ki, qrup mərhələsində də layiqli mübarizə aparmağa çalışacağıq”.Baş məşqçi qrup mərhələsində qarşılaşacaqları rəqiblərin güclü və təcrübəli oyunçulara malik olduğunu diqqətə çatdırıb: “Qrup mərhələsində iştirak edəcək komandalarda kifayət qədər güclü, təcrübəli və keyfiyyətli oyunçular var. Əlbəttə ki, rəqiblərimizi yenidən təhlil etməyə başlayacağıq. Artıq bu istiqamətdə işlərə başlamışıq və qarşıdakı rəqiblərimizi yüksək səviyyədə qiymətləndiririk. Çətin olacağını bilirik, lakin inanıram ki, bunun öhdəsindən gələcəyik”.Z.Rəcəbov komandanın qrup mərhələsində də iddialı olduğunu və öz sözünü deməyə çalışacağını söyləyib: “Əgər bu səviyyəyə qədər gəlib çıxmışıqsa, bundan sonra da öz sözümüzü deməyə hazır olmalıyıq. Komandamız yeni formalaşsa da, qrup mərhələsində də iddialı olmağa və layiqli mübarizə aparmağa hazırıq”.Komandanın hazırlıq prosesi barədə danışan mütəxəssis hər bir rəqibin ayrıca təhlil olunduğunu və qarşılaşmalara xüsusi plan əsasında hazırlaşdıqlarını bildirib: “Hər bir rəqib və oyun üçün xüsusi hazırlıq prosesi keçirik. Məşqlərimiz intensiv şəkildə davam edir. Əlbəttə ki, rəqiblərimizin oyun xüsusiyyətlərinə uyğun olaraq taktiki və texniki hazırlıq istiqamətində müəyyən dəyişikliklər edirik. Bəzən yorğunluq hiss olunur, amma bu, idmanın bir parçasıdır. İdman məhz həmin yorğunluğu və çətinlikləri dəf etməyi, əzmkarlıq və xarakter nümayiş etdirməyi tələb edir. Biz də bu xarakteri ortaya qoymağa çalışırıq”.Baş məşqçi, həmçinin yerli çempionatda mübarizənin məsuliyyətindən də söz açıb: “Bu mövsüm yerli çempionatda hələ rəsmi oyunumuz olmayıb. İnşallah, yaxın zamanda reallaşacaq. Həm ölkə çempionatında, həm də CEV Çempionlar Liqasının qrup mərhələsində mübarizə aparmaq kifayət qədər yorucu və məsuliyyətlidir. Lakin inanıram ki, komandamız bunun öhdəsindən layiqincə gələcək”.Qeyd edək ki, püşkün nəticəsinə əsasən, D qrupunda mübarizə aparacaq Tovuz təmsilçisinin rəqibləri Türkiyənin “Eczacıbaşı Peron İstanbul”, İtaliyanın “Savino Del Bene Skandicci” və Serbiyanın “Tent Obrenovats” komandalarıdır. “Turan” qrup mərhələsində ilk oyununu noyabrın 25-də səfərdə İtaliyanın “Savino Del Bene Skandicci” klubuna qarşı keçirəcək. Müxbir-Mikayıl Məmmədov
