Bakı, 12 noyabr, AZƏRTAC“Bərabər İmkanlar” layihəsinin əsas məqsədi görmə məhdudiyyətli şəxslər üçün bərabər imkanların təşviq edilməsi, onların cəmiyyətə inteqrasiyasına dəstək göstərilməsi, inklüzivlik prinsiplərinin gücləndirilməsidir. Layihə çərçivəsində musiqi, mədəniyyət, səhiyyə və təhsil sahələrində mövcud imkanların təşviqi istiqamətində müxtəlif tədbirlərin, konfransların keçirilməsi, eləcə də videosüjetlərin hazırlanması nəzərdə tutulur.Bunu AZƏRTAC-a müsahibəsində "Bərabər İmkanlar" layihəsinin rəhbəri Elnar Musayev deyib."Bu, bizim ilk sosial layihəmizdir. İndiyədək əsasən mədəni layihələri həyata keçirirdik. "Bərabər İmkanlar” layihəsi isə sosial istiqamətdə atdığımız yeni addımdır. Düşünürəm ki, bu layihə vasitəsilə görmə məhdudiyyətli, özünü cəmiyyətdən kənarda hiss edən bir çox insana dəstək ola, onların sosial mühitə uyğunlaşmasına, cəmiyyətə daha fəal inteqrasiyasına və mövcud imkanlardan bərabər şəkildə yararlanmasına kömək edə biləcəyik", - deyə layihə rəhbəri qeyd edib. Müxbir- Günel Türksoy Fotoqraf- Səfiyar Məcnun
