Möhtərəm cənab Prezident!
Sizi 44 Günlük vətən müharibəsinin 6-cı ildönümü ilə əlaqədar səmimi-qəlbdən təbrik edir, ölkəmizin inkişafı, dövlətçiliyimizin möhkəmləndirilməsi və milli maraqlarımızın qorunması istiqamətində həyata keçirdiyiniz məqsədyönlü siyasətdə uğurlar arzulayıram.
Ölkəmizdə gənclərə göstərilən diqqət və qayğı, onların ictimai-siyasi proseslərdə iştirakına yaradılan imkanlar mənim üçün xüsusi əhəmiyyət daşıyır. Mən, Məhəmməd Mehdizadə, əslən Qərbi Azərbaycanın Vedibasar rayonundan olan, gənclər sahəsində ictimai-siyasi fəaliyyət göstərən, könüllülük təşəbbüslərində və müxtəlif ictimai platformalarda fəal iştirak edən bir gənc kimi bu diqqətə görə Sizə minnətdarlığımı bildirirəm.
Hazırda Azərbaycan Uşaqlarının İnkişaf Platforması və digər ictimai sahələrdə təmsil olunaraq gənclərin inkişafına, ictimai fəallığın artırılmasına və milli-mənəvi dəyərlərimizin təbliğinə töhfə verməyə çalışıram.
Möhtərəm cənab Prezident, Sizin gənclərə ünvanladığınız çağırışları, dövlətçilik, milli həmrəylik və vətənə sədaqət prinsiplərini gələcək fəaliyyətimdə əsas istiqamətlərdən hesab edirəm. İctimai-siyasi həyatda daha fəal iştirak etmək, dövlətimizin inkişafına töhfə vermək və gənclərin səsini layiqincə təmsil etmək əsas məqsədlərimdəndir.
Gənclərə yaradılan imkanlara və həyata keçirilən dövlət gənclər siyasətinə görə Sizə bir daha təşəkkürümü bildirir, Azərbaycan naminə fəaliyyətinizdə müvəffəqiyyətlər arzulayıram.
Dərin hörmət və ehtiramla,
Məhəmməd Mehdizadə
Azərbaycan Respublikası, Abşeron rayonu, Mehdiabad qəsəbəsi