Rusiyanın Soçi şəhərində sabiq hakim Sergey Boqdanoviç barəsində cinayət işinin başlanmasına razılıq verilib.
Bu barədə ölkənin Ali Məhkəməsi məlumat yayıb.
Bildirilib ki, Rusiya Hakimlərinin Ali İxtisas Kollegiyası Soçinin Lazarevski Rayon Məhkəməsinin istefada olan hakimi barəsində cinayət işi başlanmasına razılıq verib.
İstintaqın məlumatına görə, Boqdanoviç müəyyən şəxslərin vasitəsilə işinə baxdığı yerli sahibkara 50 milyon rubl müqabilində real həbs cəzasından yayınmağı təklif edib. Razılaşmaya əsasən, sahibkar məbləğin yarısını məhkəmə baxışından əvvəl, qalan hissəsini isə hökm elan edildikdən sonra ödəməli imiş.
Hakim sahibkara pulu toplamaq üçün vaxt vermək məqsədilə məhkəmə iclasını təxirə salıb.
Pulun ötürülməsi vasitəçilər üzərindən, əməliyyat-axtarış tədbirləri çərçivəsində həyata keçirilib.
Boqdanoviç barəsində Rusiya Cinayət Məcəlləsinin xüsusilə külli miqdarda rüşvət alma maddəsi ilə cinayət işinin başlanması nəzərdə tutulur.