Bazel, 8 noyabr, AZƏRTAC İsveçrənin Bazel şəhərində 8 Noyabr – Zəfər Gününün altıncı ildönümü münasibətilə təntənəli konsert proqramı təşkil olunub.AZƏRTAC xəbər verir ki, tədbir İsveçrədə fəaliyyət göstərən “Azərbaycan Dostları Birliyi”, Azərbaycan Diasporuna Dəstək Fondu və Azərbaycanın İsveçrədəki səfirliyinin birgə təşkilatçılığı ilə keçirilib.Konsert proqramının açılışında Azərbaycanın ərazi bütövlüyü və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.“Azərbaycan Dostları Birliyi”nin rəhbəri Arzu Əliyeva Bodmer tədbiri açaraq, 8 Noyabr – Zəfər Gününün Azərbaycan xalqının tarixində qürur və şərəf səhifəsi olduğunu vurğulayıb. Bildirib ki, bu əlamətdar tarix ölkənin ərazi bütövlüyünün bərpası ilə yanaşı, milli-mənəvi dəyərlərin, tarixi yaddaşın və milli kimliyin qorunması baxımından da müstəsna əhəmiyyət daşıyır.Arzu Əliyeva Bodmer xaricdə yaşayan azərbaycanlıların milli kimliyinin qorunmasında, Azərbaycan həqiqətlərinin beynəlxalq ictimaiyyətə çatdırılmasında və zəngin mədəni irsimizin təbliğində diaspor təşkilatlarının mühüm rolunu qeyd edib. O, bu kimi tədbirlərin soydaşlarımızın Vətənlə mənəvi bağlarının möhkəmləndirilməsinə və milli həmrəyliyin gücləndirilməsinə xidmət etdiyini bildirib.Daha sonra Azərbaycanın İsveçrədəki səfiri Vaqif Sadıqov çıxış edərək, ölkəmizin şanlı Zəfər yolundan, 44 günlük Vətən müharibəsində qazanılmış tarixi Qələbənin əhəmiyyətindən, ərazi bütövlüyünün və suverenliyin tam bərpasından danışıb.Səfir 2020-ci ildə əldə edilən tarixi Zəfərin Azərbaycan xalqının uzun illər davam edən mübarizəsinin, sarsılmaz iradəsinin və milli birliyinin nəticəsi olduğunu vurğulayıb. O qeyd edib ki, xalqın Prezident, Müzəffər Ali Baş Komandan İlham Əliyevin ətrafında sıx birləşməsi, Azərbaycan Silahlı Qüvvələrinin qəhrəmanlığı və Vətənə sonsuz bağlılıq tarixi Qələbənin əldə olunmasında həlledici rol oynayıb.Tədbirin bədii hissəsində azərbaycanlı musiqiçilər Vasif Hüseyn (fortepiano), Gülbən Haşim (vokal) və Anar Vəlizadə (balaban) çıxış ediblər. Konsert proqramında Azərbaycan musiqisinin zənginliyi, milli-mədəni irsimizin özünəməxsusluğu və xalqımızın musiqi ənənələri təqdim olunub.
