Bakı, 7 noyabr, AZƏRTAC Azərbaycanın Livandakı səfirliyi tərəfindən 8 Noyabr Zəfər gününün 6 illiyinə həsr olunmuş tədbir keçirilib. Bu barədə AZƏRTAC-a səfirlikdən məlumat verilib.Bildirilib ki, səfirliyin əməkdaşları ailə üzvləri ilə birlikdə Livanda türkmənlərin yaşadığı Akkar vilayətinin Kavaşra qəsəbəsində 44 günlük Vətən müharibəsi şəhidlərinin xatirəsinə ucaldılmış abidə kompleksini ziyarət edib, abidənin önünə əklil qoyublar. Sonra şəhidlərin ruhuna yerli din xadimləri tərəfindən dualar oxunub.Bölgədən olan millət vəkilinin, Kavaşra və qonşu bələdiyyələrin rəhbərlərinin, muxtarların, din xadimlərinin, Livan-Azərbaycan Dostluq Cəmiyyətinin üzvlərinin qatıldığı tədbirdə səfir Səməd Həsənov çıxış edərək Zəfər gününün bütün dünyadakı azərbaycanlılar üçün çox əhəmiyyətli bayram olduğunu vurğulayıb, müqəddəs torpaqlarımızın işğalda qaldığı gündən qələbəyə qədərki dövrə qısa tarixi ekskurs edib, 30 illik işğaldan sonra Müzəffər Ali Baş Komandan İlham Əliyevin qətiyyətli mövqeyi, ordumuzun rəşadəti, əsgər və zabitlərin qəhrəmanlığı, şəhidlərimizin qanı, habelə qazilərimizin sarsılmaz iradəsi və döyüş əzminin sayəsində torpaqlarımızın işğaldan azad edildiyini bildirib. Qələbənin xalq-iqtidar, xalq-ordu birliyi zəminində əldə edilməsinə xüsusi diqqət yetirilib. Həmçinin qələbədən dərhal sonra təzminat tələb edilməsi və s. əvəzinə Müzəffər Ali Baş Komandanın beynəlxalq hüquq prinsipləri əsasında qarşı tərəfə sülh müqaviləsi imzalamağı təklif etməsinin isə Azərbaycan xalqının və dövlətinin humanist təbiətindən irəli gəldiyi önə çəkilib, sülh danışıqlarının hazırkı gedişi və azad edilmiş ərazilərdə aparılan bərpa-yenidənqurma işləri barədə məlumat verib.Sonra Kavaşra bələdiyyə rəisi Məhəmməd Xalid Abdullah, Orta Dreyb bələdiyyələri birliyinin sədri Alaa Əbdülvahid və Livan-Azərbaycan Dostluq Cəmiyyətinin sədri Əkrəm Tarhini çıxış edərək xalqımızı təbrik edib, sevincimizə şərik olduqlarını bildiriblər.Tədbir Kavaşra qəsəbəsinin gənclərinin hazırladıqları bədii proqram və Zəfər gününə həsr olunmuş filmin nümayişi ilə davam edib. Səfir Səməd Həsənov şəhidlərimizin xatirəsinə göstərdikləri ehtirama görə Livan xalqına, ölkənin rəhbərliyinə təşəkkürünü bildirib, bunun iki ölkə arasındakı əlaqələrin dostluq xarakteri daşımasının bariz nümunəsi olduğunu deyib.Tədbirin sonunda səfirlik adından şəhidlərimizin əziz xatirəsinə ehsan verilib.
