Bakı, 4 noyabr, AZƏRTAC İslam Əməkdaşlıq Təşkilatının (İƏT) Baş katibi İsmayıl Ould Şeyx Əhmədin və İslam Dünyası Təhsil, Elm və Mədəniyyət Təşkilatının (ICESCO) Baş direktoru Səlim bin Məhəmməd əl-Malikin Azərbaycana səfərləri ölkəmizin İslam dünyasındakı artan nüfuzunun və beynəlxalq əməkdaşlıqda oynadığı mühüm rolun göstəricisidir. Hər iki nüfuzlu beynəlxalq təşkilatın rəhbərinin Prezident İlham Əliyev tərəfindən qəbul edilməsi, dövlət və ictimai xadimlərlə görüşlər keçirməsi, eləcə də Bakıda təşkil olunan beynəlxalq tədbirlərdə iştirakı Azərbaycanla İslam dünyası arasında əlaqələrin yüksək səviyyədə olduğunu nümayiş etdirir.Bu sözləri AZƏRTAC-a açıqlamasında “Sosial-İqtisadi və Kənd Təsərrüfatının İnkişafına Dəstək” İctimai Birliyinin sədri Zülfiyyə Nuriyeva söyləyib. O deyib ki, bu səfərlər Prezident İlham Əliyevin rəhbərliyi ilə Azərbaycanın həyata keçirdiyi uğurlu xarici siyasətin, İslam həmrəyliyinin gücləndirilməsinə və mədəniyyətlərarası dialoqa verdiyi töhfələrin beynəlxalq səviyyədə yüksək qiymətləndirilməsinin ifadəsidir: “Eyni zamanda, bu görüşlər elm, təhsil, mədəniyyət və humanitar sahələrdə əməkdaşlığın genişləndirilməsi, həmçinin vətəndaş cəmiyyəti institutları arasında əlaqələrin inkişafı baxımından yeni imkanlar yaradır.Azərbaycan artıq uzun illərdir ki, mötəbər beynəlxalq tədbirlərə uğurla ev sahibliyi edir və bu istiqamətdə zəngin təcrübə qazanıb. Bunun növbəti nümunəsi Bakıda keçirilmiş VII Ümumdünya Mədəniyyətlərarası Dialoq Forumudur. Prezident İlham Əliyevin təşəbbüsü ilə əsası qoyulmuş “Bakı Prosesi” çərçivəsində təşkil olunan bu Forum dünyanın müxtəlif ölkələrindən dövlət rəsmilərini, beynəlxalq təşkilatların rəhbərlərini, ekspertləri və vətəndaş cəmiyyəti nümayəndələrini bir araya gətirdi”. O əlavə edib ki, Azərbaycanın bu cür tədbirlərə ev sahibliyi etməsi təkcə yüksək təşkilatçılıq imkanlarının deyil, həm də ölkəmizə göstərilən beynəlxalq etimadın ifadəsidir. Azərbaycan artıq yalnız beynəlxalq təşəbbüslərdə iştirak edən deyil, həm də qlobal əhəmiyyətli müzakirələrə ev sahibliyi edən, müxtəlif mədəniyyətlər və sivilizasiyalar arasında dialoqa töhfə verən ölkə kimi tanınır. Bu cür səfərlər və beynəlxalq tədbirlər, eyni zamanda, elm, təhsil, mədəniyyət və humanitar sahələrdə əməkdaşlığın genişləndirilməsi, vətəndaş cəmiyyəti institutları arasında əlaqələrin inkişafı baxımından da mühüm imkanlar yaradır.
