Bakı, 3 noyabr, AZƏRTAC Ali Məhkəmənin Mülki kollegiyasının hakimi Zaur Əliyevin “Sahiblik” adlı yeni dərs vəsaiti işıq üzü görüb.Ali Məhkəmədən AZƏRTAC-a verilən məlumata görə, kitab mülki hüququn əsas institutlarından biri olan sahibliyin nəzəri və praktiki məsələlərinin kompleks tədqiqinə həsr edilib.Nəşrdə sahiblik mülkiyyət hüququndan fərqli və müstəqil hüquqi əhəmiyyət daşıyan institut kimi araşdırılıb, onun müasir mülki hüquqda yeri və əhəmiyyəti, sahibliyin mahiyyəti, funksiyaları və növləri, əldə olunması, verilməsi və itirilməsi, müdafiəsi, sahiblik prezumpsiyaları, eləcə də sahibin hüquq və öhdəlikləri geniş təhlil olunub.Tədqiqat Azərbaycan Respublikasının mülki qanunvericiliyi və məhkəmə təcrübəsi əsasında aparılıb. Müəllif ayrı-ayrı hüquqi məsələlərin araşdırılması zamanı Roma hüququna, hüquq doktrinasına və xarici ölkələrin hüquqi təcrübəsinə də müraciət edib.Kitabda mövcud qanunvericiliyin mübahisəli və natamam məqamları nəzərdən keçirilib, onların təfsiri və təkmilləşdirilməsi ilə bağlı müəllifin hüquqi mövqeləri irəli sürülüb.Dərs vəsaitinin rəyçiləri Ali Məhkəmənin Mülki kollegiyasının sədri Sənan Hacıyev, Martin Lüter adına Halle-Vittenberq Universitetinin professoru Azər Əliyev, Bakı Dövlət Universitetinin Hüquq fakültəsinin dosenti Sərvər Süleymanlı və Milli Aviasiya Akademiyasının professoru Nazim Cəfərlidir.Kitab hüquq fakültələrinin tələbə və müəllimləri, hakimlər, vəkillər, digər hüquqşünaslar, elmi-tədqiqat fəaliyyəti ilə məşğul olan şəxslər, eləcə də mülki hüququn nəzəri və praktiki məsələləri ilə maraqlanan geniş oxucu auditoriyası üçün nəzərdə tutulub.