Hantavirusun Andes ştammı dünyada yayıla bilər. Buna səbəb potensial təhlükəli bölgələrə turist səfərlərinin artması və insanların virusun təbii daşıyıcıları ilə təmasda olmasıdır.
"Qaynarinfo"ya istinadən, bu barədə Rusiya Elmlər Akademiyasının Sibir bölməsinin Novosibirsk Dövlət Universitetinin virusoloqu, biotexnologiya, mikrobiologiya və virusologiya laboratoriyasının rəhbəri Sergey Netesov TASS-a açıqlamasında bildirib.
Mütəxəssisin sözlərinə görə, hantavirusun törətdiyi ağciyər sindromu artıq yalnız müəyyən ərazilərə xas infeksiya kimi qiymətləndirilməməlidir. O, xüsusilə Cənubi Amerikaya səyahətlərin, qütb bölgələrinə kruiz turlarının və insanların virusun təbii mənbələri ilə təmasının yoluxma riskini artıra biləcəyini qeyd edib.
Məlumata görə, 2026-cı ilin aprel-may aylarında Atlantik okeanı üzərindən Argentinadan Kabo-Verde istiqamətində hərəkət edən MV Hondius kruiz gəmisində hantavirusla əlaqəli yoluxma halları qeydə alınıb. Hadisə nəticəsində üç sərnişin həyatını itirib. Onlarda ağır tənəffüs xəstəliyinin əlamətləri müşahidə olunub.
Sonradan İsveçrə, İsrail, Almaniya, Böyük Britaniya, Fransa, İspaniya və ABŞ-da da yoluxma halları təsdiqlənib.
Hantavirusun yayılması ilə bağlı xəbərlər COVID-19 pandemiyasının təkrarlanması ehtimalına dair narahatlıqları artırıb. Bununla belə, virusoloqun açıqlaması onun mütləq qlobal pandemiyaya səbəb olacağı anlamına gəlmir. Xəstəliyin yayılma riski virusun xüsusiyyətlərindən, yoluxma yollarından və insanlar arasında ötürülmə imkanlarından asılıdır.