Bakı, 21 noyabr, AZƏRTAC Azərbaycanın müasir siyasi tarixində elə hadisələr var ki, onların əhəmiyyəti yalnız baş verdiyi dövrün reallıqları ilə deyil, həm də gələcək nəsillərin taleyinə göstərdiyi təsirlə ölçülür. 1992-ci il noyabrın 21-də Yeni Azərbaycan Partiyasının yaradılması məhz belə tarixi hadisələrdən biridir. Bu, sadəcə yeni bir siyasi təşkilatın meydana gəlməsi deyil, ölkənin mürəkkəb siyasi şəraitdən çıxışına, dövlətçiliyin qorunmasına və milli inkişaf strategiyasının formalaşmasına yönəlmiş böyük ictimai-siyasi iradənin təzahürü idi.Bu fikirləri AZƏRTAC-a açıqlamasında politoloq Əfəndi İbrahimli deyib.Ötən əsrin 90-cı illərinin əvvəllərində Azərbaycanın son dərəcə mürəkkəb tarixi sınaqlarla üz-üzə qaldığını bildirən politoloq qeyd edib ki, siyasi qeyri-sabitlik, idarəetmə böhranı, Ermənistanın hərbi təcavüzü, torpaqlarımızın işğalı və dövlət müstəqilliyinin itirilməsi təhlükəsi cəmiyyətdə ciddi narahatlıq doğururdu. Belə bir şəraitdə xalq güclü siyasi liderə, milli maraqları rəhbər tutan prinsipial mövqeyə və ölkəni böhrandan çıxara biləcək aydın inkişaf strategiyasına ehtiyac duyurdu. Məhz həmin tarixi məqamda Azərbaycan xalqının Ümummilli Lideri Heydər Əliyevin siyasi təcrübəsi, müdrikliyi və dövlətçilik təfəkkürü cəmiyyətin diqqət mərkəzinə çevrildi. Azərbaycanın müxtəlif bölgələrindən olan 91 ziyalının 1992-ci il oktyabrın 16-da Heydər Əliyevə müraciəti, onun isə bu müraciətə müsbət cavabı yeni siyasi hərəkatın əsasını qoydu.“1992-ci il noyabrın 21-də Naxçıvanda keçirilən təsis konfransında Yeni Azərbaycan Partiyası yaradıldı və Heydər Əliyev partiyanın Sədri seçildi. Bununla Azərbaycanın siyasi həyatında yeni mərhələnin başlanğıcı qoyuldu. Yeni Azərbaycan Partiyası qısa müddətdə xalqın etimadını qazanaraq ümumxalq partiyasına çevrildi.Ulu Öndər Heydər Əliyevin rəhbərliyi ilə Yeni Azərbaycan Partiyası ölkədə siyasi sabitliyin bərqərar olunması, dövlət institutlarının möhkəmləndirilməsi, milli maraqların qorunması və Azərbaycanın beynəlxalq münasibətlər sistemində layiqli yer tutması istiqamətində mühüm siyasi qüvvə kimi çıxış etdi. Ümummilli Liderin müəyyənləşdirdiyi dövlətçilik fəlsəfəsi, azərbaycançılıq ideologiyası və milli həmrəylik prinsipləri partiyanın siyasi fəaliyyətinin əsas ideoloji dayaqlarına çevrildi. Bu siyasi irs bu gün Yeni Azərbaycan Partiyasının Sədri, Prezident İlham Əliyevin rəhbərliyi ilə yeni tarixi mərhələdə uğurla davam etdirilir. Prezident İlham Əliyevin uzaqgörən siyasəti nəticəsində Azərbaycan öz ərazi bütövlüyünü və suverenliyini tam bərpa edib, regionun güclü və nüfuzlu dövlətlərindən birinə çevrilib. 44 günlük Vətən müharibəsində qazanılmış tarixi Zəfər və 2023-cü ilin sentyabrında suverenliyimizin tam bərpası Azərbaycan dövlətçiliyinin ən şanlı səhifələrindəndir”, - deyə o əlavə edib. Ə.İbrahimlinin sözlərinə görə, bu Zəfər, eyni zamanda, Ulu Öndər Heydər Əliyevin müəyyən etdiyi dövlətçilik strategiyasının, Prezident İlham Əliyevin qətiyyətli siyasi iradəsinin və Azərbaycan xalqının milli birliyinin təntənəsidir. Əldə olunan tarixi nailiyyətlər Yeni Azərbaycan Partiyasının siyasi məsuliyyətini və ideoloji missiyasını daha da artırır. Bu gün Yeni Azərbaycan Partiyası yalnız siyasi təşkilat deyil, həm də dövlətçilik ənənələrinin qorunması, milli maraqların müdafiəsi, gənc nəslin vətənpərvərlik ruhunda formalaşması və cəmiyyətin siyasi proseslərdə fəal iştirakının təmin edilməsi baxımından mühüm ictimai-siyasi institutdur. Partiyanın fəaliyyəti zamanın tələblərinə uyğun olaraq yenilənir, yeni hədəflər və strateji vəzifələrlə zənginləşir.“Xüsusilə Yeni Azərbaycan Partiyasının VIII Qurultayında müəyyənləşdirilən vəzifələr onun qarşıdakı dövr üçün fəaliyyət istiqamətlərini, ideoloji işin gücləndirilməsini, təşkilati strukturun təkmilləşdirilməsini və Ərazi Partiya Təşkilatlarının fəaliyyətinin daha da genişləndirilməsini ön plana çıxarır. Bu, partiyanın cəmiyyətlə əlaqələrinin möhkəmləndirilməsi və siyasi proseslərdə iştirakının daha da fəallaşdırılması baxımından mühüm əhəmiyyət daşıyır.Yeni Azərbaycan Partiyasının 34 illik tarixi göstərir ki, bu siyasi təşkilat zamanın sınaqlarından keçərək öz ideoloji əsaslarına və dövlətçilik prinsiplərinə sadiq qalıb. Onun keçdiyi yol müstəqil Azərbaycanın formalaşması, möhkəmlənməsi və qüdrətlənməsi tarixi ilə sıx bağlıdır”, - deyə Ə.İbrahimli vurğulayıb. Politoloq diqqətə çatdırıb ki, Yeni Azərbaycan Partiyasının 34 illik fəaliyyəti bir həqiqəti təsdiqləyir: güclü dövlət, milli birlik və qətiyyətli liderlik Azərbaycanın davamlı inkişafının başlıca təminatıdır.