Bakı, 21 noyabr, AZƏRTAC 34 il əvvəl, 1992-ci il noyabrın 21-də, Azərbaycanın dərin siyasi və iqtisadi böhranla üzləşdiyi, dövlət müstəqilliyinin ciddi təhlükələrlə qarşı-qarşıya qaldığı bir şəraitdə Yeni Azərbaycan Partiyasının təsis edilməsi ölkəmizin gələcək taleyi baxımından tarixi əhəmiyyət daşıyan hadisə oldu. Bu, sadəcə yeni siyasi təşkilatın yaradılması deyil, xalqımızın Ulu Öndər Heydər Əliyevin siyasi iradəsinə və liderlik keyfiyyətlərinə olan inamının, müstəqilliyimizin qorunması naminə vahid məqsəd ətrafında birləşmək əzminin təzahürü idi.Bu fikirləri AZƏRTAC-a açıqlamasında Milli Məclisin deputatı Xanlar Fətiyev söyləyib. O qeyd edib ki, ötən əsrin 90-cı illərinin əvvəllərində respublikamızda cərəyan edən gərgin proseslər, getdikcə daha da dərinləşməkdə olan siyasi böhran hər kəsi düşündürürdü. Eyni zamanda hər kəs inanırdı ki, Azərbaycanı düşdüyü ağır vəziyyətdən yalnız görkəmli dövlət xadimi Heydər Əliyev xilas edə bilər. Çünki Heydər Əliyev buna qədər çalışdığı hər bir vəzifədə dövlətə və xalqa layiqli xidmətin ən böyük, əvəzolunmaz nümunələrini yaratmışdı. Bu baxımdan 1992-ci ilin oktyabrında bir qrup ziyalının Heydər Əliyevə yeni siyasi partiyanın yaradılması ilə bağlı etdiyi tarixi müraciət bütün Azərbaycan xalqının Ulu Öndərə olan inamının təcəssümü idi. O zaman Ulu Öndər Heydər Əliyev ziyalıların müraciətinə cavabında yazırdı: “Güman edirəm ki, müstəqil Azərbaycan dövlətinin gələcək həyatının və fəaliyyətinin əsasını təşkil edən demokratiya və siyasi plüralizm şəraitində Sizin müraciətinizdə göstərilən Yeni Azərbaycan Partiyasının yaradılması obyektiv zərurətdən doğur. Belə partiya Azərbaycanın siyasi-ictimai həyatında fəal iştirak edərək yeni, müstəqil Azərbaycan dövlətinin möhkəmləndirilməsində və inkişafında tarixi rol oynaya bilər”.Deputat vurğulayıb ki, YAP müxalifət partiyası kimi siyasi meydana çıxmışdı. Amma bu gün özünü müxalifət hesab edən qaragüruhçu qruplardan fərqli olaraq dövlətə qarşı müxalif deyildi. Mövcud problemlərdən çıxış yolları ilə bağlı konkret proqram müəyyən edən YAP-ın fəaliyyəti sivil və demokratik siyasi münasibətlərə əsaslanırdı. Bu baxımdan, YAP Azərbaycanın siyasi mühitinə həm də yeni siyasi mədəniyyət nümunəsi gətirdi.“Heydər Əliyevin 1993-cü ildə siyasi hakimiyyətə qayıdışından sonra YAP-ın da statusu dəyişdi. Beləliklə, yarandıqdan qısa müddət sonra hakim siyasi qüvvəyə çevrilən YAP Ulu Öndər Heydər Əliyevin rəhbərliyi ilə qarşısında dayanan siyasi, iqtisadi və sosial məramları uğurla həyata keçirməyə başladı, islahatlara özünün layiqli töhfələrini verdi. YAP-ın 34 illik tarixində əlamətdar hadisələr çoxdur. Əlbəttə ki, partiyanın fəaliyyəti bir çox siyasi meyarlarla yanaşı seçkilərdə iştirakla ölçülür. Bu mənada ötən bu müddətdə respublikamızda keçirilən bütün seçkilərin qaliblərinin məhz YAP-ın namizədləri olması partiyanın böyük uğurudur. Ən əsası, seçkilərdəki qələbələr Heydər Əliyevin partiyasına olan dərin ümumxalq etimadının təzahürüdür.Yeni Azərbaycan Partiyasının qazandığı bütün uğurlar, həm sıralarının daha da genişlənməsi, həm də ölkəmizin inkişafına verilən töhfələr göstərir ki, partiya Prezident İlham Əliyevin rəhbərliyi ilə Ulu Öndər Heydər Əliyevin əsasını qoyduğu missiyanı layiqincə davam etdirir, qarşısına qoyduğu məramları uğurla həyata keçirir”, - deyə deputat Xanlar Fətiyev əlavə edib.