Naxçıvan, 20 noyabr, AZƏRTAC Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən 20 Noyabr – Ümumdünya Uşaq Hüquqları Günü münasibətilə tədbir keçirilib.Komitənin mətbuat xidmətindən AZƏRTAC-ın bölgə müxbirinə bildirilib ki, əvvəlcə Dövlət Himni səsləndirilib, Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib.Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək bildirib ki, uşaq hüquqlarının müdafiəsi dövlət siyasətinin əsas istiqamətlərindən biridir. Azərbaycanda əsasını Ümummilli Lider Heydər Əliyevin qoyduğu və Prezident İlham Əliyev tərəfindən uğurla davam etdirilən dövlət uşaq siyasəti çərçivəsində bu gün uşaq hüquqlarının müdafiəsi, onların sağlamlığının qorunması, təhsil imkanlarının genişləndirilməsi və layiqli vətəndaş kimi formalaşması istiqamətində mühüm və ardıcıl işlər görülür. Həmçinin uşaqların himayədarı olan Azərbaycan Respublikasının Birinci vitse-prezidenti Mehriban xanım Əliyevanın bu sahədə həyata keçirdiyi humanitar təşəbbüslər uşaq hüquqlarının müdafiəsinə, xüsusilə həssas qruplardan olan uşaqların sağlam və təhlükəsiz mühitdə böyüməsinə, onların sosial müdafiəsinin gücləndirilməsinə mühüm töhfə verir.Komitə sədri vurğulayıb ki, cari ildə dövlət uşaq siyasətinin həyata keçirilməsi sahəsində 111 tədbir, 34 görüş, 9 seminar, 7 təlim, 2 ustad dərsi keçirilib, 1 festival, 2 ekskursiya, 1 yay düşərgəsi və 1 yaradıcılıq müsabiqəsi təşkil edilib. Bununla yanaşı, uşaq hüquqlarının qorunması vəziyyətinin öyrənilməsi məqsədilə 68 monitorinq aparılıb. Qeyd edilib ki, ölkəmizdə, o cümlədən onun ayrılmaz tərkib hissəsi olan Naxçıvan Muxtar Respublikasında uşaqlara xüsusi diqqət və qayğı göstərilir. Onların sağlamlığının qorunması, təhsili, istedadlarının üzə çıxarılması, intellektual və mənəvi inkişafı, asudə vaxtlarının səmərəli təşkili, düzgün tərbiyə olunması, eləcə də cəmiyyətin ictimai-mədəni həyatında iştiraklarının təmin edilməsi istiqamətində mühüm tədbirlər həyata keçirilir.Naxçıvan Muxtar Respublikası Nazirlər Kabineti Aparatının Humanitar və sosial məsələlər şöbəsinin müdir müavini Hüseyn Hacıyev çıxışında bildirib ki, 20 Noyabr tarixi bütün dünyada uşaqların hüquqlarının qorunmasına, onların sağlam, təhlükəsiz və firavan mühitdə böyüməsinə diqqətin artırılması baxımından xüsusi əhəmiyyət daşıyır. Bu əlamətdar gün uşaqların hüquqlarının qorunmasının, onların təhlükəsiz və sağlam mühitdə böyüməsinin, hərtərəfli inkişafı üçün bərabər imkanların yaradılmasının vacibliyini bir daha diqqətə çatdırır. Uşaqların hüquq və mənafelərinin müdafiəsi sahəsində dövlət siyasətinin əsas məqsədi hər bir uşağın layiqli həyat səviyyəsinin, zəruri maddi və məişət şəraitinin təmin olunması, habelə onların hərtərəfli inkişafı və layiqli vətəndaş kimi formalaşması üçün əlverişli mühitin yaradılmasıdır.Vurğulanıb ki, Naxçıvan Muxtar Respublikasında uşaq hüquqlarının müdafiəsi, onların hərtərəfli inkişafı, keyfiyyətli təhsilə əlçatanlığın təmin edilməsi və sağlam həyat tərzinin formalaşdırılması istiqamətində dövlət siyasəti çərçivəsində təhsil və idman sahələrində ardıcıl və məqsədyönlü tədbirlər görülür.Tədbir müddətində “Fırçanla hüquqlarını bəyan et” rəsm müsabiqəsi keçirilib və münsiflər tərəfindən müsabiqənin qalibləri müəyyənləşib. Həmçinin cari il ərzində Naxçıvan şəhərində təhsil, incəsənət və idman sahələrində fərqlənən uşaqlara, həm də “Fırçanla hüquqlarını bəyan et” rəsm müsabiqəsinin qaliblərinə diplom və hədiyyələr təqdim olunub.Sonra sosial qayğıya ehtiyacı olan 65 uşağa qış geyimləri verilib. Tədbirin bədii hissəsində Heydər Əliyev Uşaq-Gənclər Yaradıcılıq Mərkəzinin mahnı və rəqs qruplarının musiqi nömrələri, 8 nömrəli körpələr evi-uşaq bağçasının və “Happy Kids” ingilis təmayüllü uşaq bağçasının balaca fidanlarının hazırladıqları bədii kompozisiyalar nümayiş etdirilib, onlara bayram hədiyyələri təqdim olunub.Müxbir- Nail Əsgərov