Kamal Abdulla Cənubi Koreyanın Honam Universitetinin rektoru ilə müqavilə imzaladı - FOTO

Noyabrın 20-də Cənubi Koreyanın Honam Universitetinin rektoru Sanqçeol Park və nümayəndə heyəti Azərbaycan Dillər Universitetinin qonağı olub.

ADU-nun rektoru, akademik Kamal Abdulla qonaqları salamlayıb, onları universitetdə görməkdən məmnun olduğunu bildirib.

Qeyd olunub ki, Azərbaycan Dillər Universiteti beynəlxalq əlaqələrinin genişləndirilməsinə, xarici ali təhsil müəssisələri ilə əməkdaşlığın inkişafına xüsusi önəm verir.

Rektor Azərbaycan və Cənubi Koreya arasında mövcud olan dostluq münasibətlərinin təhsil, elm və mədəniyyət sahələrində əməkdaşlığın daha da gücləndirilməsi üçün universitetlərarası əlaqələrin inkişafının, tələbə və müəllim mübadiləsinin, birgə layihələrin həyata keçirilməsinin əhəmiyyətini vurğulayıb.

ADU-da fəaliyyət göstərən Koreya Araşdırmalar Mərkəzinin fəaliyyəti haqqında məlumat verən rektor mərkəzin Koreya dilinin, ədəbiyyatının, tarixinin və mədəniyyətinin öyrənilməsi, eləcə də Azərbaycan və Cənubi Koreya arasında akademik və mədəni əlaqələrin inkişaf etdirilməsi baxımından mühüm platforma olduğunu qeyd edib.

Bildirilib ki, ADU-da təhsil alan tələbələr Koreya dilinə, mədəniyyətinə, ədəbiyyatına və tarixinə böyük maraq göstərir. Universitetdə Koreya dilinin tədrisinə, Koreya mədəniyyətinin tanıdılmasına və iki ölkə arasında mədəni əlaqələrin inkişafına xüsusi diqqət yetirilir.

Universitetlər arasında müəllim və tələbə mübadiləsinin əhəmiyyətindən danışan akademik Kamal Abdulla bu cür təşəbbüslərin akademik təcrübənin paylaşılması, elmi əlaqələrin genişləndirilməsi və tələbələrin beynəlxalq təhsil imkanlarından yararlanması baxımından mühüm rol oynadığını vurğulayıb.

Görüş zamanı Cənubi Koreyanın Honam Universitetində Azərbaycan dili və mədəniyyəti mərkəzinin yaradılması təklifi irəli sürülüb. Qeyd olunub ki, belə bir mərkəzin fəaliyyətə başlaması Azərbaycan dilinin, ədəbiyyatının və milli-mədəni irsinin Cənubi Koreyada tanıdılması, eləcə də iki ölkə arasında humanitar və akademik əlaqələrin genişləndirilməsi baxımından əhəmiyyətli addım ola bilər.

Səmimi qarşılanmaya və qonaqpərvərliyə görə təşəkkürünü bildirən Honam Universitetinin rektoru Sanqçeol Park Azərbaycan Dillər Universiteti ilə tanışlıqdan məmnunluğunu ifadə edib.

O, iki universitet arasında əməkdaşlığın inkişaf etdirilməsinin, qarşılıqlı akademik təcrübə mübadiləsinin və birgə təşəbbüslərin həyata keçirilməsinin əhəmiyyətini vurğulayıb.

Həmçinin Azərbaycan dili və mədəniyyətinin Cənubi Koreyada tanıdılması istiqamətində irəli sürülən təklifi müsbət qiymətləndirib.

Universitetlər arasında elmi və mədəni əməkdaşlığın genişləndirilməsinin əhəmiyyətindən danışan Sanqçeol Park qarşılıqlı təcrübə mübadiləsinin, birgə elmi layihələrin və mədəni tədbirlərin həyata keçirilməsinin hər iki ali təhsil müəssisəsi üçün yeni imkanlar yaradacağını bildirib.

Görüşün sonunda Azərbaycan Dillər Universiteti və Honam Universiteti arasında əməkdaşlıq haqqında müqavilə imzalanıb. Sənəd iki ali təhsil müəssisəsi arasında akademik əlaqələrin inkişaf etdirilməsini, müəllim və tələbə mübadiləsinin təşviqini, elmi və mədəni sahələrdə birgə layihələrin həyata keçirilməsini nəzərdə tutur.

Qeyd edək ki, Cənubi Koreyanın Honam Universiteti 1978-ci ildə təsis edilib. Universitet müxtəlif ixtisas istiqamətləri üzrə bakalavr və magistratura səviyyələrində təhsil proqramları həyata keçirir.

Beynəlxalq əməkdaşlığın inkişafına xüsusi önəm verən ali təhsil müəssisəsi xarici universitetlərlə akademik əlaqələrin qurulması, tələbə və müəllim mübadiləsi, elmi-tədqiqat fəaliyyətinin genişləndirilməsi istiqamətində fəaliyyət göstərir.