Bakı, 20 noyabr, AZƏRTAC 2020-ci il sentyabrın 27-də başlanan 44 günlük İkinci Qarabağ müharibəsi ölkəmizin parlaq Qələbəsi ilə başa çatdı. Azərbaycanın hərbi-siyasi Qələbəsinin və Ermənistanın kapitulyasiyasının təsdiqi olan 2020-ci il noyabrın 10-da imzalanmış üçtərəfli Bəyanatın şərtlərinə uyğun olaraq, Ermənistan silahlı qüvvələri Ağdam rayonunun işğal altında olan hissəsini boşaltmağa məcbur oldu. 2020-ci il noyabrın 20-də Azərbaycan Silahlı Qüvvələri heç bir itki vermədən, bir güllə belə atmadan Ağdam şəhərinə daxil oldu. Bu hadisə döyüş meydanında qazanılan hərbi üstünlüyün siyasi-diplomatik müstəvidə məntiqi davamı kimi tarixə yazıldı. 2020-ci il noyabrın 23-də Prezident İlham Əliyev və birinci xanım Mehriban Əliyeva işğaldan azad edilmiş Ağdam şəhərində oldular. Müzəffər Ali Baş Komandan İlham Əliyev Ağdamda Azərbaycanın üçrəngli Bayrağını qaldırdı. Daha sonra dövlətimizin başçısı və birinci xanım Ağdam məscidini ziyarət etdilər. Prezident İlham Əliyev Məkkədən gətirdiyi “Qurani-Kərim”i Ağdam məscidinə bağışladı. Ağdam məscidinin qarşısında çıxış edən Prezident İlham Əliyev bildirdi ki, həmin gün Ağdam şəhərində olması, məscidi ziyarət etməsi və Azərbaycan Dövlət Bayrağını ucaltması tarixi hadisədir. Dövlətimizin başçısı Ağdamın işğaldan azad olunmasını tarixi missiyanın şərəflə yerinə yetirilməsi kimi qiymətləndirərək vurğuladı ki, döyüş meydanında əldə edilən Qələbə Ağdam, eləcə də Kəlbəcər və Laçın rayonlarının bir güllə atmadan, bir şəhid vermədən işğaldan azad edilməsinə imkan yaratdı. Bu fikirləri AZƏRTAC-a Milli Məclisin deputatı Malik Həsənov bildirib. Deputat xatırladıb ki, tarixən Qarabağın iqtisadi, mədəni və sənaye mərkəzlərindən biri olan Ağdam 1993-cü il iyulun 23-də Ermənistan silahlı qüvvələri tərəfindən işğal edilib. 42 gün davam edən ağır döyüşlər nəticəsində rayon ərazisinin 73 faizi, o cümlədən Ağdam şəhəri və 90 kənd işğal olunub, 128 min sakin məcburi köçkün həyatı yaşamağa məcbur edilib. 27 illik işğal dövründə Ağdam görünməmiş vandalizmə məruz qalıb. Şəhərin bütün infrastrukturu, yaşayış binaları, məktəblər, mədəniyyət ocaqları, məscidlər və qəbiristanlıqlar tamamilə yerlə-yeksan edilib. Dağıntıların miqyasına görə beynəlxalq ekspertlər və jurnalistlər Ağdamı “Qafqazın Xirosiması” və “Ruhlar şəhəri” adlandırıblar. Ağdam şəhərinin 2022-ci ilin oktyabrında Azərbaycan Milli Şəhərsalma Forumuna ev sahibliyi etməsi bütün bu reallıqların beynəlxalq ictimaiyyətə çatdırılmasında əhəmiyyətli rol oynayıb. Malik Həsənov vurğulayıb ki, bu gün Ağdam tamamilə yeni mərhələyə – bərpa və Böyük Qayıdış dövrünə qədəm qoyub. Şəhərdə aparılan bərpa-quruculuq işlərinin miqyası olduqca genişdir. Bərdə-Ağdam avtomobil və dəmir yolu xətləri, eləcə də Ağdam Dəmir Yolu və Avtovağzal Kompleksi regionun nəqliyyat qovşağına çevrilməsinə zəmin yaradır. Ağdam Sənaye Parkının yaradılması və burada müxtəlif istehsal müəssisələrinin fəaliyyətə başlaması bölgənin iqtisadi potensialını yenidən canlandırır. Ağdam Muğam Mərkəzinin açılışı, tarixi-dini abidələrin bərpası şəhərin qədim ruhunu özünə qaytarır. Yeni yaşayış komplekslərinin salınması, Kəngərli, Sarıcalı və Xıdırlı kimi kəndlərin bərpası keçmiş məcburi köçkünlərin doğma yurdlarına qayıdışını təmin edir. Deputat diqqətə çatdırıb ki, Ağdam keçmiş məcburi köçkünlərin qayıtdığı 10 şəhər sırasındadır. 2026-cı ilin noyabr ayına olan məlumata əsasən, Ağdam şəhərində 1002 ailə olmaqla 3604 nəfər, Xıdırlı kəndində 659 ailə olmaqla 2621 nəfər, Kəngərli kəndində 292 ailə olmaqla 1261 nəfər, Sarıcalı kəndində isə 193 ailə olmaqla 814 nəfər məskunlaşıb. Ümumilikdə bu ərazilərdə 2146 ailə olmaqla 8300 nəfər yaşayır. Malik Həsənov qeyd edib ki, dövlətimizin başçısı İlham Əliyevin Sərəncamı ilə işğaldan azad edilmiş ərazilərimiz üzrə şəhər günlərinin təsis edilməsi Zəfərimizin və böyük dirçəlişin rəmzidir. Bu günlər görülən işlərin təqdimatında əhəmiyyətli rol oynayır. Bir vaxtlar dağıntıları ilə qəlbimizdə dərin kədər doğuran Ağdamın bu gün yenidən Qarabağın incisi kimi dirçəlməsi böyük qürur hissi doğurur.