Bakı, 20 noyabr, AZƏRTAC İtaliyanın Genuya şəhərindəki Xristofor Kolumb Aeroportu ərazidə dronların müşahidə olunması səbəbindən iki saat müddətinə bağlanıb.AZƏRTAC xəbər verir ki, bu barədə İtaliyanın AGI informasiya agentliyi məlumat yayıb. Bildirilib ki, hava limanının ətrafında dronların görünməsi ilə bağlı təhlükəsizlik tədbirləri görülüb və yerli vaxtla saat 20:10-da hava məkanında uçuşlar dayandırılıb. Yoxlamalar başa çatdıqdan - saat 22:00-dan sonra uçuşlara qoyulan məhdudiyyət aradan qaldırılıb.Hadisə zamanı Romaya uçmalı olan “ITA Airways” aviaşirkətinə məxsus sərnişin təyyarəsinin uçuşuna icazə verilməyib. Sərnişinlər təyyarədən düşürülüb, yoxlamalardan sonra yenidən təyyarəyə mindiriliblər.Hava limanının uçuş-enmə zolağının şərq və qərb hissələrində dronların olması ehtimalı ilə bağlı xəbərdarlıq sonradan ləğv edilib.