Bakı, 19 noyabr, AZƏRTAC Azərbaycanın enerji və nəqliyyat sahələrində yaratdığı strateji imkanlar ölkəmizin beynəlxalq siyasi çəkisinin və regional nüfuzunun möhkəmlənməsində mühüm rol oynayır. Bu imkanlar Azərbaycanın yalnız coğrafi mövqeyindən deyil, həm də həyata keçirdiyi məqsədyönlü iqtisadi və siyasi strategiyadan irəli gəlir.Bunu AZƏRTAC-a açıqlamasında türk siyasi ekspert Gökalp Şentürk bildirib. Onun sözlərinə görə, Azərbaycan son illərdə enerji təhlükəsizliyi və beynəlxalq nəqliyyat bağlantıları baxımından mühüm strateji mövqeyə yüksəlib. “Ölkənin həyata keçirdiyi infrastruktur layihələri, enerji ixracı istiqamətlərinin şaxələndirilməsi və tranzit imkanlarının genişləndirilməsi Azərbaycanın beynəlxalq münasibətlər sistemində rolunu daha da artırır. Azərbaycanın enerji siyasəti Avropanın enerji təhlükəsizliyinin təmin olunmasında xüsusi əhəmiyyət daşıyır. Xüsusilə Cənub Qaz Dəhlizi vasitəsilə Azərbaycan qazının Avropa bazarlarına çatdırılması ölkəmizin etibarlı enerji tərəfdaşı kimi mövqeyini gücləndirir. Eyni zamanda, bərpaolunan enerji mənbələrinin inkişafı, Xəzər dənizinin külək enerjisi potensialından istifadə və yaşıl enerji ixracı istiqamətində həyata keçirilən layihələr Azərbaycanın gələcək enerji strategiyasının mühüm tərkib hissəsidir. Nəqliyyat və logistika sahəsində Azərbaycanın artan imkanları da ölkənin geosiyasi əhəmiyyətini yüksəldən əsas amillərdəndir. Şərqlə Qərb, Şimalla Cənub arasında mühüm bağlantı nöqtəsində yerləşən Azərbaycan Orta Dəhlizin inkişafında aparıcı rol oynayır. Bakı Beynəlxalq Dəniz Ticarət Limanı, Bakı-Tbilisi-Qars dəmir yolu və digər nəqliyyat infrastrukturu layihələri beynəlxalq yükdaşımaların genişləndirilməsinə, regionlararası iqtisadi əlaqələrin möhkəmlənməsinə xidmət edir”, - Gökalp Şentürk qeyd edib.O vurğulayıb ki, müasir dövrdə enerji və nəqliyyat marşrutlarına nəzarət, onların təhlükəsizliyi və fasiləsiz fəaliyyəti dövlətlərin beynəlxalq mövqeyinə birbaşa təsir göstərən amillər sırasındadır: “Azərbaycan bu sahələrdə formalaşdırdığı imkanlarla regional əməkdaşlığın genişlənməsinə töhfə verməklə yanaşı, müxtəlif tərəfdaşlar üçün strateji əhəmiyyət daşıyan ölkəyə çevrilir. Azərbaycanın enerji və nəqliyyat sahələrində qazandığı üstünlüklər ölkənin xarici siyasət imkanlarını da genişləndirir. Bu istiqamətlərdə əməkdaşlığın dərinləşdirilməsi Azərbaycanın beynəlxalq tərəfdaşlarla münasibətlərinin möhkəmlənməsinə, iqtisadi təhlükəsizliyinin artırılmasına və uzunmüddətli regional sabitliyə töhfə verəcək. Beləliklə, enerji və nəqliyyat sahələrində həyata keçirilən strateji layihələr Azərbaycanın yalnız iqtisadi inkişafına deyil, həm də beynəlxalq siyasi nüfuzunun artmasına xidmət edən mühüm vasitələrdir”.