Bakı, 13 noyabr, AZƏRTAC COP31 çərçivəsində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğanın nümayiş etdirdikləri səmimi münasibət iki ölkə arasında strateji tərəfdaşlığın, qarşılıqlı etimadın və tarixi qardaşlığın güclü təzahürüdür. Liderlərin bir arada əyləşməsi, səmimi söhbətləri və mehriban görüntüləri diplomatik protokol çərçivəsindən kənara çıxan siyasi və rəmzi mesajlar daşıyır.Bu fikirləri AZƏRTAC-a açıqlamasında Türkiyənin Uludağ Universitetinin professoru Mehmet Yüce açıqlamasında bildirib.Onun sözlərinə görə, beynəlxalq münasibətlərdə liderlərin davranışları bəzən rəsmi bəyanatlardan daha güclü mesajlar verə bilir. Bu baxımdan COP31 çərçivəsində yaranan mənzərə iki ölkənin bir-birinə olan etimadını, siyasi yaxınlığını və ortaq gələcəyə dair baxışını beynəlxalq ictimaiyyətə nümayiş etdirir. Türkiyə və Azərbaycan regional və qlobal proseslərə münasibətdə ortaq strateji perspektiv formalaşdıra bilən, bir-birinin milli maraqlarını və həssas məqamlarını nəzərə alan iki mühüm müttəfiqdir. Enerji təhlükəsizliyi, nəqliyyat dəhlizləri, regional sabitlik, iqtisadi əməkdaşlıq və Türk dünyasının inteqrasiyası kimi bir çox istiqamətdə nümayiş etdirilən birgə iradə bu müttəfiqliyin konkret göstəriciləridir. Buna görə də iki ölkə liderinin nümayiş etdirdiyi yaxınlıq mövcud əməkdaşlığın siyasi səviyyədə də güclü şəkildə dəstəkləndiyini Türkiyə-Azərbaycan münasibətlərini dünyadakı digər ikitərəfli əlaqələrdən fərqləndirən əsas xüsusiyyət onların dövlət maraqları və diplomatik sazişlər çərçivəsini aşaraq ortaq tarix, mədəniyyət, dil və sivilizasiya dəyərləri əsasında formalaşmasıdır. Ortaq tarix, dil, mədəniyyət, inanc və sivilizasiya dəyərləri iki ölkə arasındakı münasibətlərin ictimai və mənəvi təməlini təşkil edir.Professor Birinci vitse-prezident Mehriban Əliyevanın tədbirdə iştirakının bu yaxınlığın humanitar və ictimai tərəfini nümayiş etdirən əlamətdar məqam olduğunu bildirib. Onun fikrincə, bu mənzərə iki ölkə arasındakı dostluğun yalnız dövlət qurumları və liderlər arasındakı münasibətlərlə məhdudlaşmadığını, ailələr, cəmiyyətlər və ortaq mədəni dəyərlər vasitəsilə də möhkəmləndiyini göstərir. “Burada Ulu Öndər Heydər Əliyevin tarixi əhəmiyyət daşıyan “Bir millət, iki dövlət” kəlamını xüsusi xatırlatmaq lazımdır. Bu ifadə bu gün Türkiyə və Azərbaycan münasibətlərinin yalnız emosional şüarı deyil, həm də strateji əməkdaşlığa istiqamət verən fundamental siyasi və ictimai anlayışdır. Prezident Rəcəb Tayyib Ərdoğan və Prezident İlham Əliyevin liderliyi ilə bu yanaşma güclü institusional əməkdaşlığa və regional miqyasda təsirli tərəfdaşlığa çevrilib. COP31 çərçivəsində nümayiş etdirilən bu səmimi münasibətlər Türk dünyası baxımından xüsusi məna daşıyır. Türkiyə və Azərbaycan arasında həmrəylik türk dövlətləri arasındakı əməkdaşlığın inkişafı və ortaq gələcəyə inamın möhkəmləndirilməsi üçün mühüm nümunədir. Çünki güclü Türk dünyası vizyonunun təməlində qarşılıqlı etimad, səmimi həmrəylik və ortaq məsuliyyət şüuru dayanır ”, - deyə Mehmet Yüce bildirib.Professor qeyd edib ki, COP31-də yaranan mənzərə iki lider arasındakı şəxsi dostluğun dövlətlərarası strateji tərəfdaşlığı gücləndirdiyini, Türkiyə-Azərbaycan qardaşlığının isə siyasi, iqtisadi, mədəni və mənəvi istiqamətlərdə bütöv bir birlik yaratdığını göstərir. “Burada verilən ən mühüm mesaj ondan ibarətdir ki, Türkiyə və Azərbaycan yalnız bu günün məsələlərində birgə hərəkət edən iki müttəfiq deyil, həm də gələcəyin regional və qlobal nizamında ortaq məsuliyyət daşımağa hazır olan iki qardaş dövlətdir”, – deyə Mehmet Yüce vurğulayıb.
