Naxçıvan, 13 noyabr, AZƏRTAC Naxçıvana ilk dəfə səfər edirəm. Bu qədim diyar məndə çox xoş təəssürat yaratdı. Səfər zamanı çoxsaylı tarixi-memarlıq abidələri ilə tanış olmaq imkanım oldu. Naxçıvanın gözəlliyi məni heyran etdi. Gələcəkdə yenidən bu gözəl diyara səfər etməyi arzulayıram.AZƏRTAC-ın bölgə müxbiri xəbər verir ki, bu sözləri Naxçıvanda keçirilən Memar Əcəmi Naxçıvaninin 900 illiyinə və “Şəhərsalma və Memarlıq İli”nə həsr olunan “Əcəmi 900: İpək yolu üzərində şəhərsalma mədəniyyəti və memarlıq” mövzusunda beynəlxalq elmi konfrans çərçivəsində jurnalistlərə müsahibəsində Çindən gələn memar, Anhui Memarlıq Universitetinin professoru Lei Zhang deyib.Tarixi-memarlıq abidələrinin qorunması məsələsinə toxunan professor Əcəmi Naxçıvaninin yaratdığı memarlıq nümunələrinin xüsusi əhəmiyyət daşıdığını bildirib: "Hesab edirəm ki, bu abidələrin daha dərindən öyrənilməsi, qorunması və gələcək nəsillərə çatdırılması üçün müasir texnologiyaların imkanlarından geniş istifadə olunmalıdır. Rəqəmsal texnologiyalar tarixi tikililərin sənədləşdirilməsi və memarlıq irsinin mühafizəsində mühüm rol oynaya bilər”. Müxbir - Nail Əsgərov
