Bakı, 10 noyabr, AZƏRTAC Azərbaycan Respublikasının Dövlət Bayrağı xalqımızın milli kimliyini, tarixi yaddaşını, dövlətçilik ənənələrini və müstəqillik ideallarını özündə təcəssüm etdirən müqəddəs dövlət rəmzidir.Bu fikirləri AZƏRTAC-a açıqlamasında iqtisad elmləri doktoru, professor Rəsmiyyə Abdullayeva bildirib.O qeyd edib ki, Azərbaycanın üçrəngli Dövlət Bayrağı ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə qəbul edilib.“Bayraq həmin gün hökumət iclasının keçirildiyi Azərbaycan Xalq Cümhuriyyəti Nazirlər Şurasının binası üzərində (indiki Azərbaycan Respublikası Dövlət Neft Şirkətinin “Azneft” İstehsalat Birliyinin binası) ucaldılıb. Bu bayraq xalqımızın Şərqdə ilk demokratik respublikalardan birini yaratdığı mürəkkəb tarixi şəraitdə milli dövlətçiliyimizin əsas rəmzlərindən birinə çevrilib. Bayrağımızın mavi, qırmızı və yaşıl rəngləri xalqımızın türk mənşəyini, müasir cəmiyyət qurmaq və demokratiyanı inkişaf etdirmək istəyini, İslam sivilizasiyasına mənsubiyyətini ifadə edir”, – deyə R.Abdullayeva bildirib.Vurğulayıb ki, bayrağımızın tarixində 1990-cı il noyabrın 17-də Naxçıvan Muxtar Respublikası Ali Məclisində qəbul edilən qərarın xüsusi əhəmiyyəti var.“Ümummilli Lider Heydər Əliyevin təşəbbüsü və sədrliyi ilə keçirilən həmin tarixi sessiyada Azərbaycan Xalq Cümhuriyyətinin üçrəngli bayrağı Naxçıvan Muxtar Respublikasının Dövlət Bayrağı kimi təsdiq edilib. Prezident İlham Əliyevin 2009-cu il noyabrın 17-də imzaladığı Sərəncamla hər il noyabrın 9-u Dövlət Bayrağı Günü kimi təsis edilib. Bu əlamətdar günün qeyd olunması bayrağımıza ümumxalq ehtiramının, milli həmrəyliyin və dövlət müstəqilliyinə bağlılığın ifadəsidir.Bu gün üçrəngli bayrağımız ölkəmizin hər yerində, xüsusilə də Azərbaycanın ərazi bütövlüyünün və suverenliyinin tam bərpasından sonra işğaldan azad edilmiş torpaqlarımızda qürurla dalğalanır. Bayrağımızın həmin ərazilərdə ucaldılması dövlətimizin suverenliyinin, xalqımızın tarixi ədalətə qovuşmasının və milli birliyimizin rəmzi məzmununu daha da gücləndirir. Üçrəngli bayrağımız daim uca olsun!”, – deyə professor fikirlərini yekunlaşdırıb.
