Bakı, 9 noyabr, AZƏRTAC Bayraq sadəcə dövlətin rəsmi atributu deyil. O, xalqın tarixi yaddaşını, siyasi iradəsini, milli kimliyini və müstəqillik uğrunda mübarizəsini özündə birləşdirən mühüm dövlətçilik rəmzidir. Bu baxımdan 9 Noyabr - Dövlət Bayrağı Günü yalnız milli rəmzlərimizə ehtiram günü deyil, Azərbaycanın dövlətçilik ənənələrinin, tarixi varisliyinin və suverenlik iradəsinin təntənəsidir.Bunu AZƏRTAC-a açıqlamasında politoloq Aydın Tağıyev deyib.O bildirib ki, Azərbaycanın üçrəngli bayrağı 1918-ci ildə Azərbaycan Xalq Cümhuriyyətinin yaradılması ilə milli dövlətçilik ideyasının siyasi-hüquqi müstəvidə təsdiqlənməsinin mühüm təzahürlərindən biri oldu. Bu, milli-mənəvi dəyərlərlə müasir dövlət quruculuğu prinsiplərini uzlaşdıran siyasi ideologiyanı əks etdirirdi. Bu baxımdan üçrəngli bayrağın qəbulunu yalnız dövlət atributunun müəyyənləşdirilməsi kimi deyil, Azərbaycanın öz tarixi kimliyinə söykənərək müstəqil siyasi iradə nümayiş etdirməsinin və dövlətçilik legitimliyini formalaşdırmasının mühüm mərhələsi kimi qiymətləndirmək lazımdır. Milli azadlıq hərəkatının geniş vüsət aldığı və sovet siyasi sisteminin dərin böhran yaşadığı mürəkkəb tarixi şəraitdə üçrəngli bayrağın yenidən dövlətçilik gündəminə gətirilməsi Azərbaycanın suverenlik iradəsinin siyasi ifadəsi kimi xüsusi əhəmiyyət daşıyırdı. Bu kontekstdə Ümummilli Lider Heydər Əliyevin təşəbbüsü ilə Naxçıvan Muxtar Respublikası Ali Məclisində qəbul edilən tarixi qərar təkcə milli dövlət rəmzinin bərpası deyil, həm də Azərbaycan Xalq Cümhuriyyətinin siyasi-hüquqi irsinə qayıdışın və müstəqil dövlətçilik kursunun institusional əsaslarının formalaşdırılmasının mühüm göstəricisi idi. Siyasi baxımdan həmin qərarın əsas mahiyyəti ondan ibarət idi ki, Azərbaycan öz gələcəyini sovet ideoloji çərçivəsində deyil, milli kimliyinə, tarixi legitimliyinə və müstəqil suverenlik hüququna əsaslanan dövlətçilik modeli üzərində qurmaq iradəsini nümayiş etdirirdi. O qeyd edib ki, müstəqil dövlət quruculuğunun müasir mərhələsində Prezident İlham Əliyevin dövlət bayrağının siyasi və ictimai statusunun möhkəmləndirilməsi istiqamətində həyata keçirdiyi təşəbbüslər milli dövlətçilik ideologiyasının institusional əsaslarının gücləndirilməsi baxımından xüsusi əhəmiyyət daşıyır. Dövlət Bayrağı Meydanının yaradılması, Dövlət Bayrağı Gününün təsis edilməsi və Bayraq Muzeyinin fəaliyyətə başlaması üçrəngli bayrağın tarixi irsdən müasir dövlət suverenliyinin mühüm siyasi rəmzinə çevrilməsinə xidmət edən ardıcıl siyasətin tərkib hissəsidir. Bu təşəbbüslər Azərbaycanın dövlətçilik kimliyinin beynəlxalq müstəvidə təqdimatını gücləndirməklə yanaşı, milli yaddaşın və ictimai həmrəyliyin möhkəmləndirilməsinə də mühüm töhfə verdi. Digər tərəfdən, Vətən müharibəsində qazanılan şanlı Zəfərdən sonrakı geosiyasi reallıqlar, ərazi bütövlüyünün və dövlət suverenliyinin bərpası Azərbaycan bayrağının siyasi məzmununa yeni tarixi çalarlar əlavə etdi. Şuşada, Xankəndidə və ölkənin digər ərazilərində üçrəngli bayrağın dalğalanması milli dövlətçilik iradəsinin və konstitusion suverenliyin simvolik ifadəsinə çevrildi. Məhz bu kontekstdə Azərbaycan bayrağı həm qazanılmış tarixi nailiyyətlərin, həm də qarşıdakı strateji hədəflərin, müstəqil xarici siyasət kursunun və dövlətçilik məsuliyyətinin təcəssümüdür.“Xüsusilə qeyd edim ki, üçrəngli bayrağımızın siyasi-fəlsəfi mahiyyəti onun rənglərinin ifadə etdiyi ideyaların müasir dövlətçilik məqsədləri ilə uzlaşmasında da özünü göstərir. Milli kimlik, müasirləşmə və mənəvi irs Azərbaycan dövlətinin tarixi və strateji inkişaf istiqamətlərini müəyyənləşdirən əsas dəyərlərdir. Bu dəyərlərin qorunması və inkişaf etdirilməsi Azərbaycanın türk dünyası ilə əlaqələrinin möhkəmləndirilməsi, beynəlxalq əməkdaşlığının genişləndirilməsi, iqtisadi tərəqqisi və müasir dövlət institutlarının inkişafı baxımından mühüm əhəmiyyət daşıyır”, – deyə politoloq əlavə edib.A.Tağıyev qeyd edib ki, nəticə etibarilə, Dövlət Bayrağı Günü Azərbaycanın tarixi yaddaşını, milli kimliyini və suverenlik iradəsini vahid dövlətçilik məfkurəsində birləşdirən əlamətdar gündür. Onun ucalığı yalnız dirəyinin hündürlüyü ilə deyil, təmsil etdiyi dövlətin gücü, hüquqi institutlarının möhkəmliyi, cəmiyyətin həmrəyliyi və xalqın rifahı ilə ölçülür. Bayrağa ehtiram, əslində, dövlətçiliyə, tarixə və gələcək nəsillər qarşısında daşıdığımız məsuliyyətə ehtiramdır. Azərbaycanın üçrəngli bayrağı keçmişimizin istiqlal yadigarı, bu günümüzün suverenlik rəmzi və gələcəyimizin dövlətçilik əmanətidir. O, tarixdən gələn milli iradəmizi gələcəyə daşıyan, müstəqil Azərbaycan dövlətinin siyasi kimliyini və əbədi varlığını təcəssüm etdirən müqəddəs rəmzdir.
